ក្រុមឧទ្ទាមស៊ីរី នៅថ្ងៃអាទិត្យ (ទី៨ ខែធ្នូ) នេះ បានប្រាប់ឲ្យដឹងថា ពួកគេបានបញ្ចប់ការគ្រប់គ្រងបែបផ្តាច់ការរយៈពេល ២៤ឆ្នាំរបស់លោក Bashar al-Assad ដោយការលើកឡើងនេះមាននៅក្នុងសេចក្តីប្រកាសលើកដំបូងរបស់ពួកគេតាមកញ្ចក់ទូរទស្សន៍រដ្ឋ បន្ទាប់ពីបានបើកការវាយលុកលឿនដូចផ្លេកបន្ទោរ ពោលគឺជាអ្វីដែលបានបង្កការភ្ញាក់ផ្អើលដល់ពិភពលោក។

គួរបញ្ជាក់ថា មន្ត្រីស៊ីរីម្នាក់ដែលត្រូវបានផ្ដល់ព័ត៌មានអំពីចំណាត់ការរបស់កងទ័ព បានប្រាប់ទីភ្នាក់ងារសារព័ត៌មាន Reuters ថា បញ្ជាការកងទ័ពស៊ីរី បានជូនដំណឹងដល់បណ្ដាមន្ត្រី នៅថ្ងៃអាទិត្យនេះថា របបរបស់លោក Assad បានដល់បញ្ចប់ហើយ។ ប៉ុន្តែក្រោយមក កងទ័ពស៊ីរីបាននិយាយថា ខ្លួនកំពុងបន្តប្រតិបត្តិការប្រឆាំងនឹង «ក្រុមភេរវករ» នៅក្នុងទីក្រុងសំខាន់ៗ គឺ Hama និង Homs ព្រមទាំងនៅតំបន់ជនបទ Deraa។

បើយោងតាមមន្រ្តីយោធាជាន់ខ្ពស់ ២រូប បានប្រាប់ទីភ្នាក់ងារសារព័ត៌មាន Reuters ថា លោក Assad ដែលបានកម្ចាត់រាល់ទម្រង់ប្រឆាំងទាំងអស់ បានភៀសខ្លួនចេញពីទីក្រុងដាម៉ាសទៅកាន់គោលដៅមិនត្រូវបានដឹងមួយ នៅព្រឹកថ្ងៃអាទិត្យនេះ ខណៈដែលក្រុមឧទ្ទាមបានអះអាងថា ពួកគេបានចូលដល់រដ្ឋធានីដោយមិនឃើញមានវត្តមានកងទ័ពរដ្ឋាភិបាលឡើយ។

ដោយសំដៅទៅពន្ធនាគារយោធាដ៏ធំមួយ នៅជាយក្រុងដាម៉ាស ជាកន្លែងដែលរដ្ឋាភិបាលស៊ីរី បានឃុំខ្លួនមនុស្សរាប់ពាន់នាក់នោះ ក្រុមឧទ្ទាមបាននិយាយថា៖ «យើងសូមចូលរួមអបអរសាទរជាមួយប្រជាជនស៊ីរី សម្រាប់ដំណឹងនៃការដោះលែងអ្នកទោសរបស់យើង និងការមានសេរីភាពរបស់ពួកគេ ហើយនិងប្រកាសពីការបញ្ចប់នៃយុគសម័យនៃភាពអយុត្តិធម៌នៅក្នុងពន្ធនាគារ Sednaya»។

ការដួលរលំជាប្រវត្តិសាស្ត្រនេះ គឺជាពេលវេលាដ៏រំជើបរំជួលមួយ សម្រាប់តំបន់មជ្ឈិមបូព៌ា ដោយបានបញ្ចប់ការគ្រប់គ្រងដោយកណ្តាប់ដៃដែករបស់គ្រួសារលើស៊ីរី ហើយក៏ជាការផ្ដល់នូវផលប៉ះពាល់ដ៏ធ្ងន់ធ្ងរដល់រុស្ស៊ី និងអ៊ីរ៉ង់ ដែលបានបាត់បង់សម្ព័ន្ធមិត្តដ៏ធំមួយ នៅទីតាំងដ៏សំខាន់របស់តំបន់នេះ។

ល្បឿនប្រែប្រួលនៃព្រឹត្តិការណ៍នេះ បានធ្វើឲ្យបណ្ដារដ្ឋធានីអារ៉ាប់ស្រឡាំងកាំង ហើយការភ័យខ្លាចមានកាន់តែខ្លាំងឡើងៗ ជុំវិញរលកថ្មីនៃអស្ថិរភាព ក្នុងតំបន់។ ហើយនេះជាចំណុចរបត់មួយ សម្រាប់ប្រទេសស៊ីរីដែលត្រូវបានបំផ្លាញដោយសង្រ្គាមជាង ១៣ឆ្នាំ ដែលបានប្រែក្លាយទីក្រុងនានាទៅជាគំនរបាក់បែក សម្លាប់មនុស្សរាប់សែននាក់ និងបង្ខំឲ្យរាប់លាននាក់ភៀសខ្លួនទៅបរទេស៕