ភាពតានតឹងបានកើនឡើងខ្លាំង នៅតាមបន្ទាត់ព្រំដែនមានកិច្ចព្រមព្រៀងបទឈប់បាញ់ រវាងអ៊ីស្រាអែល និងស៊ីរី នៅតំបន់ Golan Heights ដែលអ៊ីស្រាអែលកាន់កាប់ នាព្រឹកថ្ងៃអាទិត្យ (ទី៨ ខែធ្នូ) នេះ ពោលគឺប៉ុន្មានម៉ោងបន្ទាប់ពីក្រុមឧទ្ទាមស៊ីរី បានប្រកាសថា ពួកគេបានបញ្ចប់អំណាចរបស់ប្រធានាធិបតី លោក Bashar al-Assad។

គួរបញ្ជាក់ថា សេចក្តីប្រកាសរបស់ពួកឧទ្ទាម តាមរយៈកញ្ចក់ទូរទស្សន៍រដ្ឋ គឺជាការបញ្ចប់របបគ្រប់គ្រងសន្តតិវង្សរយៈពេល ៥០ឆ្នាំ បន្ទាប់ពីមានការវាយលុកយ៉ាងលឿនដូចផ្លេកបន្ទោរ ដោយនេះបានបង្កើននូវទិដ្ឋភាពនៃរលកអស្ថិរភាពថ្មី នៅតំបន់មជ្ឈិមបូព៌ាដែលញាំញីដោយសង្រ្គាម។

អ៊ីស្រាអែល ដែលបានធ្វើឲ្យចុះខ្សោយយ៉ាងខ្លាំងដល់ក្រុមហេសបូឡាគាំទ្រដោយអ៊ីរ៉ង់ នៅប្រទេសលីបង់ និងក្រុមហាម៉ាស នៅតំបន់ហ្កាហ្សា ទំនងជានឹងអបអរ ចំពោះការដួលរលំរបស់លោក Assad ដែលជាសម្ព័ន្ធមិត្តក្នុងតំបន់ដ៏សំខាន់មួយផ្សេងទៀតរបស់អ៊ីរ៉ង់។ ប៉ុន្តែការរំពឹងទុក ដែលថា ក្រុមអ៊ិស្លាមនិយមគ្រប់គ្រងស៊ីរី ទំនងជានឹងបង្កើនក្ដីបារម្ភកាន់តែខ្លាំងឡើងៗ។

នៅក្នុងសេចក្តីថ្លែងការណ៍ជាលាយលក្ខណ៍អក្សរ យោធាអ៊ីស្រាអែលបានឲ្យដឹងថា ខ្លួនមិនជ្រៀតជ្រែកព្រឹត្តិការណ៍ផ្ទៃក្នុងរបស់ប្រទេសស៊ីរីនោះទេ ប៉ុន្តែបានប្រាប់ថា បន្ទាប់ពីមានព្រឹត្តិការណ៍ថ្មីៗនេះ «ក្នុងនោះរួមទាំងការបញ្ចូលបុគ្គលិកប្រដាប់អាវុធចូលទៅក្នុងតំបន់ការពារ» ខ្លួនត្រូវ «ដាក់ពង្រាយកងកម្លាំងនៅក្នុងតំបន់ទ្រនាប់ និងកន្លែងជាច្រើនទៀតដែលចាំបាច់ ដើម្បីការពារខ្លួន»៕