មនុស្ស ដែលទៅជួបជុំក្នុងចំនួនដ៏ច្រើនសន្ធឹកសន្ធាប់ បានអបអរដល់ការដួលរលំនៃរបបរបស់លោក Bashar al-Assad ក្នុងទីក្រុងអ៊ីស្តង់ប៊ុល ប្រទេសទួរគី នៅថ្ងៃអាទិត្យ (ទី៨ ខែធ្នូ) នេះ ដោយនាំគ្នារាំ ច្រៀង និងគ្រវីទង់ជាតិដែលប្រើប្រាស់ដោយក្រុមប្រឆាំងស៊ីរី។

គួរបញ្ជាក់ថា ក្រុមឧទ្ទាមស៊ីរី បានប្រកាសពីការបណ្តេញលោកប្រធានាធិបតី Assad ចេញពីតំណែង បន្ទាប់ពីដណ្តើមទីក្រុងដាម៉ាស នៅថ្ងៃអាទិត្យនេះ ដោយបញ្ចប់ការដឹកនាំប្រទេសយ៉ាងតឹងរ៉ឹងរបស់គ្រួសារលោក ក្រោយពីមានសង្គ្រាមស៊ីវិលជាង ១៣ឆ្នាំ ហើយនេះជាពេលវេលាដ៏រំជើបរំជួលមួយ សម្រាប់តំបន់មជ្ឈិមបូព៌ា។

នេះក៏ជាចំណុចរបត់មួយផងដែរ សម្រាប់ប្រទេសស៊ីរី ដែលត្រូវបានបំផ្លាញដោយសង្រ្គាមជាច្រើនឆ្នាំ ពោលគឺជម្លោះដែលបានប្រែក្លាយទីក្រុងនានាទៅជាគំនរបាក់បែក សម្លាប់មនុស្សរាប់សែននាក់ និងបង្ខំឲ្យរាប់លាននាក់ភៀសខ្លួនទៅបរទេស។

ប្រជាជនស៊ីរីជាង ៣លាននាក់ រស់នៅក្នុងប្រទេសទួរគី ដោយភាគច្រើននិយាយថា ពួកគេមិនអាចត្រឡប់ទៅទីក្រុង និងភូមិស្រុករបស់ពួកគេវិញបានទេ ដរាបណាលោក Assad នៅតែបន្តកាន់អំណាច៕