នគរបាលកុបកម្មឥណ្ឌា នៅថ្ងៃអាទិត្យ (ទី៨ ខែធ្នូ) នេះ បានបាញ់ឧស្ម័នបង្ហូរទឹកភ្នែកដាក់កសិករដែលកំពុងតវ៉ា នៅព្រំដែនភាគខាងជើង រវាងរដ្ឋ Punjab និង Haryana និងដែលកំពុងនាំគ្នាដើរឆ្ពោះសំដៅទៅទីក្រុង New Delhi (ញូវដេលី)។

រូបភាពវីដេអូថតដោយយានដ្រូន បានបង្ហាញកសិកររាប់រយនាក់ដើរដង្ហែដោយកាន់ទង់សហជីព នៅកន្លែងតវ៉ា។ ការប្រឈមមុខដាក់គ្នា បានកើតឡើងនៅចម្ងាយជាង ២០០គីឡូម៉ែត្រ ភាគខាងជើងនៃរដ្ឋធានី ខណៈដែលកសិករប្រមាណជា ១០០នាក់ ដែលភាគច្រើនមកពីរដ្ឋកសិកម្ម នៅភាគខាងជើង បានព្យាយាមចាប់ផ្ដើមការដើរដង្ហែឈ្មោះ «Delhi Chalo» (តស់ទៅទីក្រុងដេលី) ឡើងវិញ ដែលការតវ៉ានេះត្រូវបានរារាំងតាំងពីខែកុម្ភៈមកម៉្លេះ។

មេដឹកនាំតំណាងឲ្យកសិករ បាននិយាយថា ពួកគេចង់ហែក្បួនដោយសន្តិវិធី និងសុខចិត្តលះបង់ធ្វើអ្វីគ្រប់យ៉ាង ដើម្បីសិទ្ធិរបស់កសិករឥណ្ឌា។ កសិករកំពុងទាមទារការធានាផ្នែកច្បាប់ ដើម្បីឲ្យមានការគាំទ្រពីរដ្ឋបន្ថែមទៀត សម្រាប់ដំណាំកសិកម្ម និងការលើកលែងបំណុល ហើយនិយាយថា រដ្ឋាភិបាលត្រូវតែគោរពតាមការសន្យារបស់ខ្លួន ដើម្បីបង្កើនប្រាក់ចំណូលរបស់ពួកគេឲ្យបានទ្វេដង។

គួរបញ្ជាក់ថា ក្រុមអ្នកតវ៉ាបានបោះជំរុំ នៅភូមិ Shambhu នៅតាមព្រំដែននៃរដ្ឋ Punjab ជាមួយរដ្ឋជិតខាង Haryana ចាប់តាំងពីខែកុម្ភៈមកម៉្លេះ នៅពេលដែលណគរបាល បានបញ្ឈប់ការហែក្បួនរបស់ពួកគេ។ រដ្ឋាភិបាលរបស់លោកនាយករដ្ឋមន្ត្រី Narendra Modi ត្រូវបានបង្ខំលុបចោលច្បាប់កសិកម្មមួយចំនួន នៅឆ្នាំ២០២១ បន្ទាប់ពីការតវ៉ារយៈពេលមួយឆ្នាំ ដោយកសិករនៅពេលដែលពួកគេបានបោះជំរុំ នៅខាងក្រៅទីក្រុងដេលី អស់ជាច្រើនខែ៕