អ្នកក្រុងសេអ៊ូលមួយចំនួនកាលពីថ្ងៃអាទិត្យ៨ ធ្នូ បានបង្ហាញទស្សនៈនិងអារម្មណ៍ផ្សេងៗ គ្នា បន្ទាប់ពីលោកប្រធានាធិបតីកូរ៉េខាងត្បូង Yoon Suk Yeol បានរួចខ្លួនពីការបោះឆ្នោតចោទប្រកាន់ទម្លាក់តំណែងកាលពីថ្ងៃសៅរ៍ ៧ ធ្នូ ចុងសប្ដាហ៍នេះ ក្រោយការប៉ុនប៉ងដាក់ច្បាប់អាជ្ញាសឹករយៈពេលខ្លីរបស់លោកកាលពីសប្ដាហ៍មុន។

គណបក្សអំណាចប្រជាជនរបស់លោក Yoon បានធ្វើពហិការមិនចូលរួមការបោះឆ្នោតចោទប្រកាន់ ទម្លាក់តំណែង ដែលបានដាក់ចេញដោយគណបក្សប្រជាធិបតេយ្យប្រឆាំងដ៏សំខាន់ ហើយញ្ញត្តិនេះត្រូវបានលុបចោល បន្ទាប់ពីសមាជិកសភាបានចូលរួមមិនគ្រប់គ្រាន់ ។

លោក Lee Sang-hyeok អ្នករស់នៅក្នុងទីក្រុងសេអ៊ូល និងជានិស្សិតមួយរូបបាននិយាយថាលោកគិតថា ទោះបីជាបានរួចផុតពីការបោះឆ្នោតទម្លាក់តំណែងក៏ដោយ ក៏លោក Yoon គួរតែចុះចេញពីតំណែងដែរ។

លោក Lee បន្ថែមថា ទោះយ៉ាងណា ប្រសិនបើមានលទ្ធផលដែលលោក Yoon នឹងចុះចេញពីតំណែង រូបលោកគួរតែធ្វើឱ្យបានឆាប់តាមដែលអាចធ្វើទៅបាន។

ចំណែកអ្នកស្រុក និងបម្រើការងារជាប្រធានគ្រប់គ្រងការិយាល័យលោកស្រី Moon Ga-yun បាននិយាយថា នាងគាំទ្រការសម្រេចចិត្តដំបូងរបស់លោក Yoon ក្នុងការប្រកាសច្បាប់អាជ្ញាសឹក ដោយសារតែនាងជឿថា បក្សប្រឆាំងរបស់ប្រទេសនេះកំពុងដឹកនាំប្រទេសទៅជារបបកុម្មុយនិស្ត។

មនុស្សរាប់ពាន់នាក់បានចេញតវ៉ាតាមដងផ្លូវនានាក្នុងការប្រមូលផ្ដុំដ៏ធំមួយជិតរដ្ឋសភាក្នុងទីក្រុងសេអ៊ូល កាលពីថ្ងៃសៅរ៍ អំពាវនាវឲ្យក្រុមតំណាងរាស្ត្របោះឆ្នោតទម្លាក់តំណែងលោក Yoon Suk Yeolដោយសារតែការដាក់ច្បាប់អាជ្ញាសឹកនេះ។

គួររម្លឹកថាលោក Yoon បានធ្វើឱ្យប្រទេសមានការភ្ញាក់ផ្អើលកាលពីយប់ថ្ងៃអង្គារសប្ដាហ៍មុន នៅពេលលោកបានប្រកាសច្បាប់អាជ្ញាសឹកជាបន្ទាន់ដោយលើកឡើងពីការគំរាមកំហែងពីកម្លាំងប្រឆាំងរដ្ឋ៕