ជាមេបញ្ជាការនៃសាខារបស់ក្រុមអាល់កៃដានៅក្នុងសង្រ្គាមស៊ីវិលស៊ីរី លោក Abu Mohammed al-Golani ដែលត្រូវបានគេស្គាល់ថា Muhammad al-Jawlani គឺជាជនស្រមោលដែលនៅក្រៅក្រសែភ្នែកសាធារណៈ ទោះបីនៅពេលដែលក្រុមរបស់លោកបានក្លាយជាក្រុមដ៏មានឥទ្ធិពលបំផុត កំពុងប្រយុទ្ធដើម្បីផ្តួលរំលំ របបលោក Bashar al-Assad ក៏ដោយ។

បច្ចុប្បន្ននេះ លោកគឺជាអ្នកដែលគេទទួលស្គាល់បំផុតនៃក្រុមឧទ្ទាមដែលមានជោគជ័យនៅប្រទេសស៊ីរី ដោយបានឈានជើងចូលជាបណ្តើរៗ ចាប់តាំងពីបានផ្តាច់ទំនាក់ទំនងជាមួយក្រុមអាល់កៃដាក្នុងឆ្នាំ ២០១៦ ដោយបានដាក់ឈ្មោះក្រុមរបស់លោកជាថ្មី និងដឹកនាំក្រុមឧទ្ទាម ដែលបានបណ្តេញលោក Assad បន្ទាប់ពីសង្រ្គាមស៊ីវិលរយៈពេល១៣ ឆ្នាំ មកនេះ។

លោក Golani គឺជាមេដឹកនាំក្រុមឧទ្ទាម Hayat Tahrir al-Sham (HTS) ដែលកាលពីពេលមុនត្រូវបានគេស្គាល់ថាជារណសិរ្ស Nusra ហើយត្រូវបានគេចាត់ទុកថាជាក្រុមភេរវកម្ម ដោយភាគច្រើននៅលើពិភពលោក។

សហរដ្ឋអាមេរិក បានចាត់ទុកលោក Golani ជាភេរវករក្នុងឆ្នាំ ២០១៣ ដោយនិយាយថា ក្រុម អាល់កៃដា (al Qaeda) នៅក្នុងប្រទេសអ៊ីរ៉ាក់ បានប្រគល់ភារកិច្ចឱ្យលោកក្នុងការផ្តួលរំលំការគ្រប់គ្រងរបស់លោក Assad និងបង្កើតច្បាប់អ៊ីស្លាម Sharia នៅក្នុងប្រទេសស៊ីរី ហើយរណសិរ្យ Nusra បានធ្វើសកម្មភាពវាយប្រហារអត្តឃាតដែលបានសម្លាប់ជនស៊ីវិល និងប្រកាន់ទស្សនៈនិកាយសាសនាដ៏ហិង្សា។

រង្វាន់សម្រាប់យុត្តិធម៌ ជាកម្មវិធីផ្តល់រង្វាន់សន្តិសុខជាតិដ៏សំខាន់របស់ក្រសួងការបរទេសសហរដ្ឋអាមេរិក នៅតែផ្តល់រង្វាន់រហូតដល់១០លានដុល្លារសម្រាប់ព័ត៌មានអំពី លោក al-Golani ។