របាយការណ៍ប្រព័ន្ធផ្សព្វផ្សាយបាននិយាយថា វិបត្តិថ្នាក់ដឹកនាំរបស់កូរ៉េខាងត្បូង កាន់តែស៊ីជម្រៅកាលពីថ្ងៃអាទិត្យ (០៨ ធ្នូ) ខណៈរដ្ឋអាជ្ញាបានដាក់ឈ្មោះលោកប្រធានាធិបតី Yoon Suk Yeol នៅក្រោមការស៊ើបអង្កេតព្រហ្មទណ្ឌជុំវិញការប៉ុនប៉ងដាក់ច្បាប់អាជ្ញាសឹកកាលពីសប្តាហ៍មុន ហើយអតីតរដ្ឋមន្ត្រីការពារជាតិរបស់លោកត្រូវបានចាប់ខ្លួន។

លោក Yoon បានរួចផុតពីការបោះឆ្នោតចោទប្រកាន់ទម្លាក់តំណែងនៅក្នុងសភា ដែលដឹកនាំដោយបក្សប្រឆាំងកាលពីល្ងាចថ្ងៃសៅរ៍ ដែលជំរុញដោយការប៉ុនប៉ងរយៈពេលខ្លីរបស់លោកក្នុងការដាក់ច្បាប់អាជ្ញាសឹកកាលពីថ្ងៃអង្គារសប្ដាហ៍មុន ប៉ុន្តែមេដឹកនាំបក្សកាន់អំណាចរបស់លោក Yoon បាននិយាយថា ប្រធានាធិបតីរូបនេះនឹងត្រូវដកចេញពីតួនាទីយ៉ាងមានប្រសិទ្ធភាព មុននឹងចុះចេញពីតំណែង។

មនុស្សរាប់ពាន់នាក់បានប្រមូលផ្តុំគ្នានៅមុខសភាក្នុងទីក្រុងសេអ៊ូល កាលពីថ្ងៃអាទិត្យ ដោយអំពាវនាវឱ្យមានការចោទប្រកាន់ និងការចាប់ខ្លួនលោក Yoon និងការរំសាយបក្សកាន់អំណាចរបស់លោក។

ការប្រកាសច្បាប់អាជ្ញាសឹករបស់លោក Yoon កាលពីថ្ងៃអង្គារ បានធ្វើឱ្យសេដ្ឋកិច្ចធំជាងគេទីបួនរបស់អាស៊ី និងជាសម្ព័ន្ធមិត្តយោធាដ៏សំខាន់របស់អាមេរិក ចូលទៅក្នុងវិបត្តិនយោបាយដ៏ធំបំផុតរបស់ខ្លួនក្នុងរយៈពេលជាច្រើនទស្សវត្សរ៍ ដោយគំរាមកំហែងធ្វើឱ្យខូចកេរ្តិ៍ឈ្មោះរបស់កូរ៉េខាងត្បូង ដែលជាប្រទេសជោគជ័យខាងលទ្ធិប្រជាធិបតេយ្យ៕