អ្នកវិទ្យាសាស្ត្រសហភាពអឺរ៉ុប បានសង្កត់ធ្ងន់ជាថ្មីម្ដងទៀតនៅថ្ងៃចន្ទ (០៩ ធ្នូ) នេះថា ឆ្នាំ២០២៤នេះ នឹងក្លាយជាឆ្នាំដែលមានអាកាសធាតុក្តៅបំផុតរបស់ពិភពលោកចាប់តាំងពីកំណត់ត្រាបានចាប់ផ្តើម ជាមួយនឹងសីតុណ្ហភាពខ្ពស់មិនធម្មតារំពឹងថានឹងបន្តរហូតដល់យ៉ាងហោចណាស់ពីរបីខែដំបូងនៃឆ្នាំ២០២៥។

ទិន្នន័យពីសេវាបម្រែបម្រួលអាកាសធាតុ ខនភឺនីខើស ឬហៅថា C3S របស់សហភាពអឺរ៉ុបនេះ កើតឡើងពីរសប្តាហ៍បុណ្ណោះបន្ទាប់ពីកិច្ចពិភាក្សាស្តីពីអាកាសធាតុរបស់អង្គការសហប្រជាជាតិ បានផ្តល់កិច្ចព្រមព្រៀងចំនួន ៣០០ពាន់លានដុល្លារ ដើម្បីដោះស្រាយបម្រែបម្រួលអាកាសធាតុ ជាកញ្ចប់មួយដែលបណ្ដាប្រទេសក្រីក្របានរិះគន់ថាមិនគ្រប់គ្រាន់ទេក្នុងការចំណាយដែលកើនឡើងមិនឈប់នៃគ្រោះមហន្តរាយទាក់ទងនឹងអាកាសធាតុ។

ក្រុម C3S បាននិយាយថា ទិន្នន័យពីខែមករា ដល់ខែវិច្ឆិកា បានបញ្ជាក់ថា ឥឡូវនេះឆ្នាំ២០២៤ គឺជាឆ្នាំដែលក្តៅបំផុតក្នុងកំណត់ត្រា ហើយជាឆ្នាំទីមួយដែលសីតុណ្ហភាពជាមធ្យមក្នុងពិភពលោកឡើងលើស ១,៥អង្សាសេ លើសពីសម័យមុនឧស្សាហកម្មឆ្នាំ១៨៥០-១៩០០។ គួររម្លឹកថា ឆ្នាំក្តៅបំផុតក្នុងកំណត់ត្រារហូតមកដល់ពេលនេះគឺឆ្នាំ២០២៣។

អាកាសធាតុធ្ងន់ធ្ងរបានវាយប្រហារជុំវិញពិភពលោកក្នុងឆ្នាំ២០២៤ ដោយគ្រោះរាំងស្ងួតធ្ងន់ធ្ងរបានវាយលុកអ៊ីតាលី និងអាមេរិកខាងត្បូង ហើយទឹកជំនន់ដ៏ធ្ងន់ធ្ងរកើតឡើងនៅនេប៉ាល់ ស៊ូដង់ និងអឺរ៉ុប ខណៈរលកកម្ដៅកើតមាននៅម៉ិកស៊ិក ម៉ាលី និងអារ៉ាប៊ីសាអ៊ូឌីត ដែលបានសម្លាប់មនុស្សរាប់ពាន់នាក់ និងគ្រោះមហន្តរាយព្យុះស៊ីក្លូនដ៏ខ្លាំងក្លាវាយប្រហារនៅសហរដ្ឋអាមេរិក និងហ្វីលីពីន៕