ប្រជាពលរដ្ឋកូរ៉េខាងត្បូងនៅថ្ងៃចន្ទ ទី៩ធ្នូដើមសប្ដាហ៍នេះ បាននិយាយថា ពួកគេកំពុងតស៊ូស្ថានភាពដ៏រំជើបរំជួល ខណៈបាតុកម្មនៅតែបន្តបង្កើតឧបសគ្គសម្រាប់ការធ្វើដំណើររបស់ពួកគេទៅកាន់រដ្ឋធានីសេអ៊ូល ជិតមួយសប្តាហ៍បន្ទាប់ពីការប៉ុនប៉ងដ៏ខុសឆ្គងរបស់លោកប្រធានាធិបតី Yoon Suk Yeol ក្នុងការប្រកាសច្បាប់អាជ្ញាសឹក។

លោកប្រធានាធិបតី Yoon បានធ្វើឱ្យប្រទេសនេះភ្ញាក់ផ្អើលយ៉ាងខ្លាំងកាលពីយប់ថ្ងៃអង្គារ ទី៣ធ្នូសប្ដាហ៍មុន នៅពេលលោកបានផ្តល់អំណាចគ្រាអាសន្នដល់យោធាដើម្បីលុបបំបាត់នូវអ្វីដែលលោកហៅថាកម្លាំងប្រឆាំងរដ្ឋ និងទប់ស្កាត់គូប្រជែងនយោបាយដែលរារាំងតែប៉ុណ្ណោះ ដើម្បីលុបចោលបទបញ្ជា នេះរយៈពេល៦ ម៉ោងក្រោយមក បន្ទាប់ពីសភាបានផ្គើនយោធានិងនគរបាល ក្នុងការបោះឆ្នោតជាឯកច្ឆ័ន្ទប្រឆាំងនឹងក្រឹត្យនេះ។សកម្មភាពនេះ បានបង្កឱ្យមានបាតុកម្មទ្រង់ទ្រាយធំ ហើយមនុស្សរាប់ម៉ឺននាក់បានធ្វើបាតុកម្មប្រឆាំង លោក Yoon ចាប់តាំងពីសប្ដាហ៍មុន បន្តមកដល់ដើមសប្ដាហ៍នេះទៀត ។

នៅព្រឹកថ្ងៃចន្ទដើមសប្ដាហ៍នេះ គេអាចមើលឃើញអ្នកធ្វើដំណើរកំពុងដើរកាត់ក្បួនបាតុកម្មមកពីគណបក្សប្រឆាំងមួយក្នុងចំណោមគណបក្សប្រឆាំងប្រជាធិបតេយ្យរបស់ប្រទេសកូរ៉េខាងត្បូង នៅឯទីលានចតុរង្គ ក្វាងវ៉ាម៉ុន (Gwanghwamun) កណ្តាលរដ្ឋធានីសេអ៊ូល។

លោក Kim Dong-hun អ្នកធ្វើដំណើរមកពីទីក្រុងជិតព្រំដែន Paju ជាប់កូរ៉េខាងជើង បាននិយាយថា ចរាចរណ៍កំពុងកកស្ទះខ្លាំង ហើយខ្ញុំជឿថារឿងទាំងអស់នេះកើតឡើងដោយសារតែភាពចលាចលនេះ។

កាលពីយប់ថ្ងៃសៅរ៍ចុងសប្ដាហ៍នេះដែរក្រុមបាតុកររាប់ពាន់នាក់ បានប្រមូលផ្ដុំគ្នាតវ៉ា ដោយដើរក្បួនសំដៅទៅកាន់អគារសភាជាតិ ខណៈបក្សប្រឆាំងរបស់ប្រទេសនេះ បានបោះឆ្នោតទម្លាក់តំណែងលោកប្រធានាធិបតី Yoon Suk Yeol តែមិនបានសម្រេច៕