ឯកឧត្តមវេជ្ជបណ្ឌិត យូ ពិសី អនុរដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ហ៊ុន ចំរើន ប្រធានក្រុមប្រឹក្សាភិបាលមជ្ឈមណ្ឌលជាតិគាំពារមាតា និងទារក បានអៈអាងថា មជ្ឈ​មណ្ឌល​ជាតិ​គាំពារមាតា និងទារក ជាមជ្ឈមណ្ឌលជាតិមួយ ដែលមាន​តួនាទី​សំខាន់​ជួយ​ក្រសួង​សុខាភិបាល ​លើការងារថែទាំ ព្យាបាលជំងឺ និងបង្ការជំងឺផងដែរ។

ការថ្លែង​រ​បស់ឯកឧត្តមវេជ្ជបណ្ឌិត យូ ពិសី យ៉ាងដូច្នេះ​ក្នុង​សិក្ខា​សាលា​ស្តីពី​ការ​ពិនិត្យ​លើ​សមិទ្ធ​ផល​ឆ្នាំ​២០២៤ និងការរៀបចំ​ផែនការ​ប្រតិបត្តិ​សម្រាប់​ឆ្នាំ​២០២៥​របស់​មជ្ឈមណ្ឌល​ជាតិ​គាំពារ​មាតា និងទារក រយៈពេល២ថ្ងៃ ចាប់ពីថ្ងៃទី៩-១០ ខែធ្នូ ឆ្នាំ២០២៤។ ឯកឧត្តម អនុរដ្ឋ​លេខា​ធិការបន្តថា ការអភិវឌ្ឍន៍ធនធានមនុស្សសុខាភិបាល ត្រូវតែធ្វើជាប្រចាំ ដើម្បីបង្កើន​សមត្ថភាព​ស្រប​តា​មបច្ចេកទេសថ្មីៗ ក្នុងការពិនិត្យ ស្រាវជ្រាវរកមូលហេតុ នៃជំងឺ ធ្វើរោគវិនិច្ឆ័យត្រឹមត្រូវ ផ្តល់​ការថែទាំសមស្រប ព្យាបាលប្រកបដោយគុណភាព និងប្រសិទ្ធិភាពខ្ពស់។ ដូចគ្នានេះដែរ សម្រាប់​ការបង្ការជំងឺ មជ្ឈមណ្ឌលជាតិគាំពារមាតា និងទារក មានកម្មវិធីជាតិ ចំនួន៥ គឺ៖ កម្ម​វិធី​ជាតិ​ ផ្តល់ថ្នាំបង្ការ កម្មវិធីជាតិ សុខភាពបន្តពូជ កម្មវិធីជាតិ អាហារូបត្ថម្ភ កម្មវិធីជាតិ ទប់ស្កាត់​ការ​ចម្លង​រោគ​ពីម្តាយទៅកូន និងកម្មវិធីជាតិ បង្ការជំងឺរាក និងរលាកផ្លូវដង្ហើមស្រួចស្រាល ដែលបាន និង​កំពុងអនុវត្តគោលនយោបាយរាជរដ្ឋាភិបាល គោលនយោបាយរបស់ក្រសួងសុខាភិបាល សំដៅ​ទៅ​សម្រេចបានគ្រប់គោលដៅ ដែលបានកំណត់ក្នុងផែនការយុទ្ធសាស្ត្រជាតិ។

បន្ថែម​ពី​លើ​នេះ​ មជ្ឈមណ្ឌលជាតិ មានផ្នែកបណ្តុះបណ្តាល ដែលដើរ​តួសំខាន់​ក្នុង​ការ​បណ្តុះ​បណ្តាល​ក្នុង​ពេល​កំពុង​បម្រើការងារ (In-service training) ដែលអាចជួយក្រសួងសុខាភិបាល ក្នុង​ការ​បំពាក់​បំប៉នជំនាញ បង្កើនសមត្ថភាពព្យាបាល សង្គ្រោះបន្ទាន់ផ្នែកសម្ភព រោគស្ត្រី ដល់​មន្ត្រី​សុខាភិបាលទូទាំងប្រទេសផងដែរ។ មិនត្រឹមតែជាមជ្ឈមណ្ឌលជាតិប៉ុណ្ណោះទេ គឺដើរ​តួ​ជា​មន្ទីរ​ពេទ្យ​ជាតិ ដែលមានភារកិច្ចពិនិត្យ និងព្យាបាលជំងឺ និងទទួល​ការ​បញ្ជូន​ជំងឺ​ពី​បណ្តាល​មន្ទីរពេទ្យ​ផ្សេង​ៗ​ក្នុង​ព្រះរាជាណាចក្រកម្ពុជា។

ឯកឧត្តមវេជ្ជ​បណ្ឌិត យូ ពិសី ក៏សូមថ្លែងអំណរគុណដល់ថ្នាក់ដឹកនាំមជ្ឈមណ្ឌលជាតិគាំពារមាតា និង​ទារក លោកសាស្ត្រាចារ្យ លោក លោកស្រី មន្ត្រី បុគ្គលិកនៃមជ្ឈមណ្ឌលជាតិគាំពារមាតា និង​ទារក​ទាំង​អស់ ដែលបានបំពេញ​ការងារ​ជួយ​សង្គ្រោះ​អាយុ​ជីវិ​តអ្នក​ជំងឺ​ប្រកប​ដោយ​ការលះ​បង់​ខ្ពស់​។

លោក​ស្រី​សាស្រ្តាចារ្យជំនួយ គឹម រ័ត្ននា នាយកមជ្ឈមណ្ឌលជាតិគាំពារមាតា និងទារក បាន​លើក​ឡើង​ថា មជ្ឈមណ្ឌលជាតិគាំពារមាតា និងទារក បានប្រែក្លាយ​ជា​គ្រឹះ​ស្ថាន​សាធារណៈ​រដ្ឋ​បាល​នៅ​ខែ​ឧសភា ឆ្នាំ២០២២ ប៉ុន្តែការអនុវត្តជាគ្រឹះស្ថានពេញលេញនៅឆ្នាំ២០២៣ ហើយ​ឆ្នាំ​នេះ​ជា​ឆ្នាំ​ទី​១ ដែលមជ្ឈមណ្ឌលបានរៀបចំសិក្ខាសាលាពិនិត្យលើវឌ្ឍនភាពការងារឆ្នាំ២០២៤ និងកា​រ​រៀប​ចំ​ផែនការ ប្រតិបត្តិសម្រាប់ឆ្នាំ២០២៥ មានរយៈពេល២ថ្ងៃដោយប្រើប្រាស់ថវិកាគ្រឹះស្ថាន។ សិក្ខាសាលានេះ មានគោលបំណងដើម្បីពិនិត្យមើលលើវឌ្ឍនភាពការងារដែលសម្រេចបាន បញ្ហា​ដែល​បាន​ជួបប្រទះ និងដំណោះស្រាយ ពិភាក្សាលើការធ្វើផែនការប្រតិបត្តិសម្រាប់ឆ្នាំ២០២៥ ប្រធាន​បទដែលត្រូវលើកយកមកបង្ហាញ និងពិភាក្សាក្នុងសិក្ខាសាលារួមមាន៖ របាយការណ៍​ប្រចាំ​ឆ្នាំ​២០២៤ របស់ការិយាល័យទាំង៣ (បច្ចេកទេស រដ្ឋបាល និងគណនេយ្យ) របាយ​ការណ៍​ប្រចាំ​ឆ្នាំ​២០២៤របស់កម្មវិធីជាតិទាំង៥ និងផ្នែកបណ្តុះបណ្តាល វិឌីអូខ្លីស្តីពីការថែទាំ​ទារក​តាម​របៀប​ម្តាយ​កង់ហ្គូរូ របាយការណ៍តាមផ្នែកនិមួយៗនៃមន្ទីរពេទ្យ(ពិគ្រោះជំងឺក្រៅ និងសម្រាក​ពេទ្យ​) ការបង្ហាញពីស្តង់ដានៃការទទួលស្គាល់គុណភាពមន្ទីរពេទ្យ ការពិភាក្សាក្រុមពីបញ្ហាឈម ដំណោះ​ស្រាយ និងការធ្វើផែនការប្រតិបត្តិសម្រាប់ឆ្នាំ២០២៥៕ អត្ថបទ រដ្ឋា