​ភ្នំពេញ៖ នៅយប់ថ្ងៃទី២៧ តុលា សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញចូលរួមកិច្ចប្រជុំកំពូលអាស៊ីបូព៌ាលើកទី១៦ តាមប្រព័ន្ធវីដេអូ ហើយសម្តេចបានចែករំលែកទស្សន ០៤ចំណុច ចូលរួមកិច្ចប្រជុំកំពូលអាស៊ីបូព៌ាលើកទី១៦នេះ។

ជាមួយក្តីសោមនស្សរីករាយដោយបានចូលរួមក្នុង កិច្ចប្រជុំកំពូលអាស៊ីបូព៌ាលើកទី១៦នេះ សម្តេចបានសូមអនុញ្ញាតចូលរួមនូវមតិមួយចំនួនពាក់ព័ន្ធនឹងប្រធានបទនៃកិច្ចប្រជុំរបស់យើង ដូចខាងក្រោម៖

ទី១-វិបត្តិនៃជំងឺកូវីដ-១៩ នៅតែជាក្តីកង្វល់ដ៏ធំមួយសម្រាប់យើងទាំងអស់គ្នា។ ដូចនេះ ការប្រយុទ្ធនឹងជំងឺកូវីដ-១៩ គឺជារបៀបវារៈចាំបាច់ក្នុងកិច្ចសហប្រតិបត្តិការអាស៊ីបូព៌ា។

កម្ពុជាយល់ថា ប្រទេសទាំងអស់ត្រូវប្រឹងប្រែង និងរួមសាមគ្គីគ្នាជាធ្លុងមួយ ក្នុងការប្រយុទ្ធនឹងជំងឺកូវីដ-១៩ នេះ ដោយមិនប្រកាន់និន្នាការនយោបាយ និងមិនយកការប្រយុទ្ធនឹងជំងឺកូវីដ-១៩ ធ្វើជារបៀបវារៈ នយោបាយ។ ទន្ទឹមនេះ, ជាមួយនឹងការអភិវឌ្ឍថ្មីៗនៃវ៉ាក់សាំង និង ថ្នាំព្យបាលកម្ពុជាក៏សុំអំពាវនាវ ឱ្យការចែកចាយវ៉ាក់សាំង និង ថ្នាំព្យាបាលជំងឺកូវីដ-១៩ ប្រព្រឹត្តទៅប្រកបដោយសមធម៌, ក្នុងតម្លៃសមរម្យ និងទាន់ពេល។

ទី២. ដើម្បីពន្លឿនការស្ដារសង្គម-សេដ្ឋកិច្ច, យើងត្រូវបន្តធានាឱ្យបាននូវដំណើរការខ្សែច្រវាក់ ផលិតកម្ម និងការផ្គត់ផ្គង និងពាណិជ្ជកម្មឆ្លងដែន, ពង្រឹងសមត្ថភាពអាជីវកម្មរបស់សហគ្រាសធុន-តូច និងមធ្យម, លើកកម្ពស់សហគ្រិនភាពរបស់ស្ត្រី និង យុវជន, ជំរុញការតភ្ជាប់ និង សម្រួលដល់ ការធ្វើដំណើរឆ្លងដែនឡើងវិញ។

ក្នុងស្មារតីនេះ កម្ពុជាសូមអបអរចំពោះការដាក់ចេញនូវ សេចក្តី ប្រកាសមេដឹកនាំកិច្ចប្រជុំកំពូលអាស៊ីបូព៌ា ស្តីពីកិច្ចសហប្រតិបត្តិការជំរុញកំណើនសេដ្ឋកិច្ចតាមការលើកកម្ពស់វិស័យទេសចរណ៍ និង សេចក្តីប្រកាសមេដឹកនាំកិច្ចប្រជុំកំពូលអាស៊ីបូព៌ាស្តីពីការស្ដារឡើង វិញប្រកបដោយចីរភាព និងបៃតង។

ទី៣-ពាក់ព័ន្ធនឹងការរៀបចំ សេចក្តីព្រាងផែនការសកម្មភាពថ្មី ឆ្នាំ ២០២៣-២០២៧, កម្ពុជា យល់ថា គួរផ្ដោតលើកិច្ចសហការក្នុងវិស័យអាទិភាពចំនួន ៤ ស្របតាមនិន្នាការសកល រួមមាន (១).ការពង្រឹងសន្តិសុខផ្នែកសុខភាពសាធារណៈ; (២).ការកសាងសមត្ថភាពសហគ្រាសខ្នាតមីកូ, តូច និងមធ្យម (MSMEs); (៣).ការជំរុញ និងការពង្រឹងកិច្ចសហប្រតិបត្តិការពាណិជ្ជកម្ម និង សេដ្ឋកិច្ចឌីជីថល; និង (៤).ថាមពលប្រកបដោយចីរភាព។ ទី៤. កម្ពុជាប្រាថ្នាចង់ឃើញតំបន់អាស៊ីអាគ្នេយ៍ ជាតំបន់សន្តិភាព, ស្ថិរភាព និង គ្មានអាវុធ នុយក្លេអ៊ែ ។ លើមូលដ្ឋាននេះ, កម្ពុជាសូមអំពាវនាវសូមឱ្យ រាល់គំនិតផ្តួចផ្តើម រួមទាំងសម្ព័ន្ធភាពយោធា ដែលនឹងត្រូវបានដាក់ចេញដោយប្រទេសអាស៊ីបូព៌ា គោរពមជ្ឍភាពអាស៊ាន, បំពេញបន្ថែមនូវយន្តការ ដែលមានស្រាប់ និងឈលើការគោរពគ្នា និង ផ្ដល់ផលប្រយោជន៍ទៅវិញទៅមក ដើម្បីរក្សាស្ថិរភាព, សន្តិសុខ, សន្តិភាព និងវិបុលភាពក្នុងតំបន់៕