នគរបាល និងមន្ត្រីក្នុងតំបន់ បាននិយាយថា ចោរសមុទ្រសូម៉ាលី ដែលបានប្លន់ទូកនេសាទចិនមួយគ្រឿង បានទាមទារប្រាក់លោះសម្រាប់ដោះលែងទូកនេះ និងសមាជិកនាវិក ១៨នាក់។

ភ្លាមៗនោះ ពុំទាន់ដឹងច្បាស់ទេថា នៅពេលណាដែលទូកនេសាទនោះ ត្រូវបានចាប់ធ្វើជាចំណាប់ខ្មាំងដោយខ្មាន់កាំភ្លើង ដែលកាន់កាំភ្លើង AK-47 ប៉ុន្តែកងកម្លាំងប្រឆាំងចោរសមុទ្ររបស់សហភាពអឺរ៉ុប បានទាមទារឲ្យមានការចាប់អារម្មណ៍ជាសកលចំពោះឧប្បត្តិហេតុនេះ កាលពីថ្ងៃព្រហស្បតិ៍។

លោក Mohamed Dini មន្ត្រីនគរបាលនៅទីក្រុងកំពង់ផែ Eyl ដែលជាបន្ទាយចោរសមុទ្រនៅលើឆ្នេរភាគខាងកើតរបស់រដ្ឋ Puntland បាននិយាយថា៖«ចោរសមុទ្រកំពុងផ្លាស់ទីទូកនោះ ចេញពីឆ្នេរសមុទ្រ ... ពួកគេកំពុងស្វែងរកទីជម្រកសុវត្ថិភាព»។

លោក Dini បាននិយាយថា ទូកនេសាទ ត្រូវបានប្លន់ដោយក្រុមខ្មាន់កាំភ្លើង ដែលត្រូវបានចុះកិច្ចសន្យា ដើម្បីផ្តល់«ការការពារ» មុនពេលត្រូវបានឃាត់ដោយចោរសមុទ្រផ្សេងទៀត ដោយបន្ថែមថា ពួកគេបានទាមទារប្រាក់សម្រាប់ការដោះលែងទូកនេះ។

លោក Ali Warsame ជាមនុស្សចាស់ម្នាក់នៅក្នុងតំបន់ ដែលដឹងពីករណីនេះ បាននិយាយថា ក្រុមហ៊ុន សូម៉ាលីដែលដើរតួជំនួសទូកនោះ បានយល់ផ្តល់ជូនប្រាក់លោះចំនួន ៣០០.000ដុល្លារ។ ប៉ុន្តែសំណើនេះ ត្រូវបានបដិសេធដោយក្រុមចោរសមុទ្រ។ អ្នកនេសាទក្នុងតំបន់ បាននិយាយថា ទូកនេះ បានចូលមកជិតកំពង់ផែ Eyl កាលពីថ្ងៃសុក្រ ប៉ុន្តែក្រុមចោរសមុទ្រ បានរុញចូលទៅក្នុងសមុទ្រវិញ ដោយសារការភ័យខ្លាចពីឆ្មាំឆ្នេរសមុទ្ររបស់រដ្ឋPuntland។