សារព័ត៌មាន Al Jazeera រាយការណ៍ថា អ៊ីស្រាអែលបានធ្វើការវាយប្រហារតាមអាកាស ទៅលើឃ្លាំងអាវុធមួយកន្លែង នៅភាគខាងត្បូងប្រទេសស៊ីរី។

យោងតាមប៉ុស្តិ៍ទូរទស្សន៍កាតា បានឲ្យដឹងថា ឃ្លាំងអាវុធដែលជាកម្មសិទ្ធិរបស់កងទ័ពស៊ីរី នៅជិតទីក្រុង Izra ក្នុងខេត្ត Daraa មានចម្ងាយ ៧០ គីឡូម៉ែត្រ (៤៣.៥ ម៉ាយ) ភាគខាងត្បូងទីក្រុងម៉ាស (Dama scus) ត្រូវរងការទម្លាក់គ្រាប់បែក។ ការវាយឆ្មក់តាមអាកាសនោះ បានបណ្តាលឲ្យមានការផ្ទុះជាច្រើន។

យោធាអ៊ីស្រាអែល បាននិងកំពុងវាយលុកយ៉ាងទៀងទាត់នូវទីតាំងបែបនេះ ដោយខ្លាចក្រែងថា «សមាភព អរិភាព»អាចប្រើអាវុធដែលរក្សាទុកនៅទីនោះប្រឆាំងនឹងរដ្ឋជ្វីហ្វ។

កងកម្លាំងប្រឆាំងប្រដាប់អាវុធរបស់ស៊ីរី បានបើកការវាយលុកទ្រង់ទ្រាយធំលើកងទ័ពរដ្ឋាភិបាល នៅក្នុងទីក្រុង Aleppo និង Idlib កាលពីថ្ងៃទី ២៧ ខែវិច្ឆិកា។ មកដល់ល្ងាចថ្ងៃទី ០៧ ខែធ្នូ ពួកគេបានដណ្តើមយកទីក្រុងធំៗជាច្រើន រួមមាន Aleppo, Hama, Deir ez-Zor, Daraa និង Homs។ កាលពីព្រឹកថ្ងៃអាទិត្យ ពួកគេបានចូលក្នុងទីក្រុងដាម៉ាស ខណៈដែលទាហានរដ្ឋាភិបាល បានដកចេញពីទីក្រុងនេះ។ ក្រោយការចរចាផ្ទៃក្នុងស៊ីរី ប្រធានាធិបតីស៊ីរី លោក បាសា អាល់អាសាដ (Bashar al-Assad) បានចុះចេញពីតំណែង ហើយរត់ភៀសខ្លួនចេញពីប្រទេស។