ទោះបីជាលោក Donald Trump ហាក់ដូចជាមិនសប្បាយចិត្ត ចំពោះស្ថានការណ៍អន្តរជាតិប្រែប្រួលមិនទៀងទាត់ ដែលលោកនឹងទទួលមរតក ក្នុងនាមជាប្រធានាធិបតីថ្មី នៅខែក្រោយ និងដែលលោកប្រាកដណាស់នឹងបញ្ចូលភាពមិនអាចទាយទុកជាមុនបានទៅក្នុងបញ្ហាមានស្រាប់ទាំងនេះ។

កាលពីថ្ងៃសៅរ៍ចុងសប្ដាហ៍កន្លងមក នៅពេលលោកបានជួបប្រធានាធិបតីបារាំង លោក Emmanuel Macron នៅទីក្រុងប៉ារីស ប្រធានាធិបតីជាប់ឆ្នោត លោក Trump បាននិយាយថា៖ «ពិភពលោកហាក់ដូចជាច្របូកច្របល់បន្តិចហើយ នាពេលនេះ»។

ហើយការដួលរលំដ៏គួរឲ្យភ្ញាក់ផ្អើលនៃរបបសន្តតិវង្ស al-Assad (អាល់-អាសាដ) នៅប្រទេសស៊ីរី កាលពីថ្ងៃអាទិត្យ (ទី៨ ខែធ្នូ) បានបង្កើតនូវកាលៈទេសៈថ្មី និងគ្រោះថ្នាក់ ដែលនឹងទាមទារឲ្យមានការយកចិត្តទុកដាក់ពីលោក Trump ទោះបីជាលោកមានបំណងចង់ផ្តាច់សហរដ្ឋអាមេរិកចេញពីសង្រ្គាមដ៏គ្រោះថ្នាក់ នៅតំបន់មជ្ឈិមបូព៌ាក៏ដោយ ហើយទំនងជានឹងផ្តល់នូវការសាកល្បងភ្លាមៗនៃគោលដៅគោលនយោបាយការបរទេស និងភាពវៃឆ្លាតរបស់លោក ក្នុងខែមករា។

កាលពីថ្ងៃសៅរ៍ ខណៈដែលក្រុមឧទ្ទាមបានសម្រុកឆ្ពោះទៅរដ្ឋធានី Damascus (ដាម៉ាស) របស់ប្រទេសស៊ីរី លោក Trump បានសរសេរនៅលើបណ្ដាញសង្គម Truth Social ជាអក្សរធំថា៖ «នេះមិនមែនជាការប្រយុទ្ធរបស់យើងទេ។ បណ្ដោយឲ្យវាកើតឡើងចុះ។ កុំពាក់ព័ន្ធជាមួយអី»។

ការអត្ថាធិប្បាយរបស់លោក គឺជាលក្ខណៈនៃការប្រតិកម្មតបនឹងគោលនយោបាយការបរទេសប្រឆាំងនឹងសង្គ្រាមជិត ២ទសវត្សរ៍របស់សហរដ្ឋអាមេរិក នៅតំបន់មជ្ឈិមបូព៌ា និងអាស៊ីខាងត្បូង។ ប៉ុន្តែក្នុងនាមជាមហាអំណាចសកលមួយ នៅក្នុងសេដ្ឋកិច្ចពិភពលោករួមបញ្ចូលគ្នា ហើយដោយសត្រូវរបស់សហរដ្ឋអាមេរិកកំពុងប្រឹងប្រែងបន្ថយឥទ្ធិពលរបស់អាមេរិក វាក៏អាចនឹងដល់ពេលដែល ដើម្បីផលប្រយោជន៍របស់អាមេរិក លោក Trump មិនមានជម្រើសអ្វី ក្រៅពីចូលរួមការទូត ប្រសិនបើមិនពាក់ព័ន្ធនឹងកម្លាំងយោធាទេនោះ៕