មន្ត្រី និងទីភ្នាក់ងារសារព័ត៌មានរុស្ស៊ី នៅថ្ងៃចន្ទ (ទី៩ ខែធ្នូ) នេះ បានឲ្យដឹងថា ហេតុការណ៍រញ្ជួយដីបានបង្កឲ្យមានជាអគ្គិភ័យ និងបញ្ឈប់ប្រតិបត្តិការរបស់អណ្តូងរ៉ែ Alardinskaya នៅភាគនិរតីនៃតំបន់ស៊ីបេរី។

ជាមួយគ្នានេះ ក្រសួងសេវាសង្គ្រោះបន្ទាន់របស់រុស្ស៊ី បានឲ្យដឹងថា កម្មករអណ្តូងរ៉ែចំនួន ១២០នាក់ ត្រូវបានជម្លៀសចេញពីអណ្តូងរ៉ែ នៅក្នុងតំបន់ធ្យូងថ្មដ៏ធំរបស់ប្រទេសរុស្ស៊ី គឺ Kuznetsk Basin ដែលត្រូវបានគេស្គាល់ថា Kuzbass ដោយមាន ២នាក់ត្រូវការជំនួយផ្នែកវេជ្ជសាស្រ្ត។

ដោយដកស្រង់ពីការិយាល័យរដ្ឋអាជ្ញាក្នុងតំបន់ ទីភ្នាក់ងារព័ត៌មានរដ្ឋ RIA និង TASS របស់រុស្ស៊ី បានរាយការណ៍ថា ហេតុការណ៍រញ្ជួយដី ទំនងជាបានបង្កឲ្យមានអគ្គិភ័យដែលមិនទាន់ត្រូវបានពន្លត់នៅឡើយទេ។ ទីភ្នាក់ងារសារព័ត៌មាន RIA បានរាយការណ៍ថា អណ្តូងរ៉ែ Alardinskaya គឺជាផ្នែកមួយនៃក្រុមហ៊ុនជីករ៉ែធ្យូងថ្ម Raspadskaya ហើយមានសមត្ថភាពផលិតធ្យូងថ្ម ៣លានតោន ក្នុងមួយឆ្នាំ។

ចំណែកទីភ្នាក់ងារសារព័ត៌មាន Interfax បានរាយការណ៍ដោយដកស្រង់សម្តីតំណាងក្រុមហ៊ុន Raspadskaya ថា ប្រតិបត្តិការត្រូវបានផ្អាក នៅអណ្តូងរ៉ែនេះ៕