អ្នកនាំពាក្យរដ្ឋាភិបាលជប៉ុន និយាយនៅថ្ងៃចន្ទនេះថា ទីក្រុងតូក្យូសង្ឃឹមយ៉ាងមុតមាំថា អំពើហិង្សានឹងបន្ធូរបន្ថយភ្លាមៗ ក្រោយក្រុមឧទ្ទាមរឹបអូសរដ្ឋធានីដាម៉ាស់របស់ប្រទេសស៊ីរី ហើយលោកប្រធានាធិបតី Bashar al-Assad បានរត់ភៀសខ្លួនទៅកាន់ប្រទេសរុស្ស៊ី ។

រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុនលោក Yoshimasa Hayashi បាននិយាយនៅក្នុងសន្និសីទសារព័ត៌មានប្រចាំថ្ងៃនាថ្ងៃចន្ទនេះថា ទីក្រុងតូក្យូ កំពុងតាមដានដោយយកចិត្តទុកដាក់យ៉ាងដិតដល់បំផុតចំពោះដំណើរវិវត្តចុងក្រោយនៅក្នុងប្រទេសស៊ីរី ។

ការរុលចូលដូចផ្លេកបន្ទោររបស់ក្រុមសម្ព័ន្ធជីវពលដឹកនាំដោយក្រុមឧទ្ទាម Hayat al-Tahrir al-Sham គឺជាអតីតសម្ព័ន្ធអាល់កៃដា បានក្លាយជាចំណុចមួយក្នុងចំណោមចំណុចផ្លាស់ប្តូរធំបំផុតសម្រាប់តំបន់មជ្ឈិមបូព៌ា ក្នុងជំនាន់ជាច្រើនកន្លងមកនេះ ។ 

ការដួលរលំទៅរបស់លោក Assad បានបំផ្លាញទីពំនាក់ដែលអ៊ីរ៉ង់ និងរុស្ស៊ី ធ្លាប់ដាក់ឥទ្ធិពលនៅទូទាំងពិភពអារ៉ាប់ ។

សារព័ត៌មានរុស្ស៊ី រាយការណ៍ថា ទីក្រុងម៉ូស្គូ បានផ្តល់សិទ្ធិជ្រកកោនដល់លោក Assad និងក្រុមគ្រួសារលោក ហើយលោក Mikhail Ulyanov គឺជាឯកអគ្គរដ្ឋទូតរុស្ស៊ីប្រចាំនៅអង្គការអន្តរជាតិក្នុងទីក្រុងវីយែន ប្រទេសអូទ្រីស ក៏បាននិយាយបែបនេះផងដែរ នៅលើបណ្តាញព័ត៌មានសង្គម Telegram កាលពីថ្ងៃអាទិត្យ ៕