​ភ្នំពេញ៖ នៅយប់ថ្ងៃទី២៧ តុលា សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញចូលរួមកិច្ចប្រជុំកំពូលអាស៊ីបូព៌ាលើកទី១៦ តាមប្រព័ន្ធវីដេអូ ហើយក្នុងកិច្ចប្រជុំកំពូលអាស៊ីបូព៌ាលើកទី១៦នេះ មេដឹកនាំបានអនុម័តឯកសារ ៣សំខាន់ ជាពិសេសពាក់ព័ន្ធសន្តិសុខផ្លូវចិត្ត និងការស្តារបៃតងឡើងវិញ។

​ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ប្រាប់ក្រុមអ្នកព័ត៌មានថា កិច្ចប្រជុំនេះ មានប្រមុខរដ្ឋប្រមុខរដ្ឋាភិបាលមកពីបណ្តាប្រទេស១៨ ក្នុងនោះ ១២អាស៊ាន និង៨ប្រទេសទៀត ជាដៃគូសន្ទនារបស់អាស៊ាន ហើយក្នុងកិច្ចប្រជុំនេះ ប្រមុខរដ្ឋប្រមុខរដ្ឋាភិបាលបានអនុម័តលើឯកសារ៣សំខាន់ៗ។

ឯកឧត្តមបន្តថា ជារួម គឺប្រមុខរដ្ឋាភិបាលអាស៊ានរួមនឹងប្រទេសដៃគូសន្ទនា ក្នុងក្របខ័ណ្ឌកិច្ចប្រជុំកំពូលអាស៊ីបូព៌ានេះ បានពិភាក្សាទៅលើប្រធានបទជាច្រើន ហើយមុនការចាប់ផ្តើមប្រមុខរដ្ឋប្រមុខរដ្ឋាភិបាល បានស្ដាប់នូវរបាយការណ៍បច្ចុប្បន្នភាពពីអគ្គនាយក នៃអង្គការសុខភាពពិភពលោក និងអគ្គនាយកនៃអង្គការពាណិជ្ជកម្មពិភពលោកពីស្ថានភាព ទាំងសុខាភិបាលបច្ចុប្បន្ន និងស្ថានភាព នៃពាណិជ្ជកម្មពិភពលោកនាពេលបច្ចុប្បន្ន ក្រោយពី១៨ខែ ក្រោយពីវិបត្តិកូវីដ១៩។លើសពីនេះទៀតជារួម បណ្ដាប្រទេសទាំងអស់បានគាំទ្រធ្វើយ៉ាងណាឲ្យមានការគាំទ្រពហុភាគីនិយម ដែលជាកត្តាសំខាន់ក្នុងកិច្ចសហការទាំងសេដ្ឋកិច្ច សន្តិសុខ ការស្ដារឡើងវិញ ជាពិសេសការប្រយុទ្ធប្រឆាំងនឹងកូវីដដដ១៩នេះ។​

លទ្ធផលជារួមគឺប្រទេសមហាអំណាចប្រទេសសំខាន់ៗ ក្នុងក្របខ័ណ្ឌអាស៊ីបូព៌ានេះ បានគាំទ្រនូវតួនាទីស្នូលរបស់អាស៊ាន ដើម្បីរក្សាសន្ដិភាព ស្ថិរភាពសន្តិសុខក្នុងតំបន់ គាំទ្រតួនាទីស្នូល របស់អាស៊ានក្នុងការជំរុញកិច្ចសហការ ហើយមិនត្រឹមតែប៉ុណ្ណោះទេ គឺផ្តល់នូវការគាំទ្រដល់ជំនួយដល់អាស៊ាន ជាពិសេសលើការងារជាបន្តទៀត ធ្វើយ៉ាងណាឲ្យទទួលបានជោគជ័យ ជាពិសេសការពារប្រឆាំងជំងឺរាតត្បាតកូវីដ១៩និងការស្ដារឡើងវិញសេដ្ឋកិច្ចក្រោយកូវីដ១៩។

ជាពិសេសទៀតនោះ គឺជំរុញការងារនៅក្នុងតំបន់ ដែលបណ្ដាប្រទេសទាំងអស់មានការគាំទ្រនិងផ្តល់ទំនុកចិត្តទៅលើតួនាទីស្នូល របស់អាស៊ានដោយផ្តល់នូវកិច្ចសហការក្នុងភាពជាដៃគូដល់អាស៊ានទាំងស្រុង៕​ អត្ថបទ៖ មុត សុទ្ធ