នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទ ទី៩ ខែធ្នូ ថា តំបន់ខ្ពង់រាប Golan Heights ដែលកាន់កាប់ដោយអ៊ីស្រាអែលរយៈពេលជិត៦០ឆ្នាំមកនេះ នឹងនៅតែជារបស់អ៊ីស្រាអែល ជារៀងរហូត។ថ្លែងនៅក្នុងសន្និសីទសារពព័ត៌មាននៅទីក្រុងហ្សេរុយសាឡឹម លោក Netanyahu បានអរគុណដល់ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump សម្រាប់ការទទួលស្គាល់ការភ្ជាប់ឧបសម្ព័ន្ធទឹកដីក្នុងឆ្នាំ១៩៨១របស់អ៊ីស្រាអែល ក្នុងអំឡុងពេលអាណត្តិដំបូងរបស់លោក និងបាននិយាយថា «តំបន់ Golan នឹងជាផ្នែកមួយនៃរដ្ឋអ៊ីស្រាអែល ជារៀងរហូត»។

អ៊ីស្រាអែល បានដណ្តើមយកតំបន់ខ្ពង់រាបភ្នំភាគច្រើនពីប្រទេសស៊ីរី ក្នុងអំឡុងសង្គ្រាមរយៈពេល៦ថ្ងៃឆ្នាំ១៩៦៧ ហើយបានកាន់កាប់ចាប់តាំងពីពេលនោះមក ដោយបានវាយរុញច្រានការប៉ុនប៉ងរបស់ស៊ីរី ក្នុងការដណ្តើមយកទៅវិញនៅក្នុងសង្រ្គាមអារ៉ាប់-អ៊ីស្រាអែល ឆ្នាំ១៩៧៣។

លោក Netanyahu បាននិយាយថា ការគ្រប់គ្រងរបស់អ៊ីស្រាអែលលើដែនដីខ្ពង់រាប «ធានាបានសន្តិសុខ និងអធិបតេយ្យភាពរបស់ខ្លួន»។

ចាប់តាំងពីក្រុមឧទ្ទាមចូលដល់ទីក្រុងដាម៉ាស ផ្តួលរំលំមេដឹកនាំស៊ីរី លោក Bashar al-Assad អ៊ីស្រាអែលបានវាយលុកទីតាំងនានាក្នុងប្រទេស រួមទាំងការទម្លាក់គ្រាប់បែកលើមូលដ្ឋានទ័ពអាកាសសំខាន់ៗចំនួនបីកន្លែងរបស់កងទ័ពស៊ីរី កាលពីថ្ងៃចន្ទ។

មន្ត្រីអ៊ីស្រាអែល បាននិយាយថា ការវាយប្រហារតាមអាកាសនឹងបន្តរយៈពេលជាច្រើនថ្ងៃទៀត ដើម្បីរក្សាអតីតឃ្លាំងអាវុធធុនធ្ងន់របស់លោក Assad ឱ្យនៅឆ្ងាយពីដៃសត្រូវ។