រដ្ឋមន្ត្រីការបរទេសសហរដ្ឋអាមេរិក លោក Antony Blinken បានព្រមានកាលពីថ្ងៃចន្ទ ទី៩ ខែធ្នូ ដែលថា ក្រុមរដ្ឋអ៊ីស្លាមនឹងព្យាយាមប្រើប្រាស់អំឡុងពេលនេះ ដើម្បីបង្កើតសមត្ថភាពឡើងវិញនៅក្នុងប្រទេសស៊ីរី ប៉ុន្តែបាននិយាយថា សហរដ្ឋអាមេរិក បានប្តេជ្ញាចិត្តថានឹងមិនអនុញ្ញាតឱ្យរឿងនេះកើតឡើងឡើយ។

លោក Blinken បាននិយាយថា ប្រជាជនស៊ីរី ត្រូវតែជ្រើសរើសអនាគតរបស់ពួកគេ ហើយសេចក្តីថ្លែងការណ៍របស់មេដឹកនាំក្រុមឧទ្ទាមចំពោះការកសាងអភិបាលកិច្ចរួម ត្រូវបានស្វាគមន៍ ប៉ុន្តែវិធានការពិតប្រាកដនឹងស្ថិតនៅក្នុងសកម្មភាពដែលពួកគេធ្វើ ពុំមែនគ្រាន់តែជាអ្វីដែលពួកគេនិយាយនោះទេ។

ក្រុមឧទ្ទាមស៊ីរី បានដណ្តើមយករដ្ឋធានីដាម៉ាស ដោយពុំមានការប្រឆាំងកាលពីថ្ងៃអាទិត្យកន្លងទៅនេះ បន្ទាប់ពីការរុលចូលទៅមុខលឿនដូចផ្លេកបន្ទោរដែលបានធ្វើឲ្យប្រធានាធិបតី លោក Bashar al-Assad ភៀសខ្លួនចេញទៅកាន់ប្រទេសរុស្ស៊ី បន្ទាប់ពីសង្គ្រាមស៊ីវិលរយៈពេល១៣ឆ្នាំ និងជាង៥ ទសវត្សរ៍នៃការគ្រប់គ្រងអំណាចផ្តាច់ការរបស់លោក។

ការបណ្តេញលោក Assad មានឡើង បន្ទាប់ពីកងកម្លាំងឧទ្ទាម បានវាយលុកចូលទីក្រុងដាម៉ាស កាលពីចុងសប្តាហ៍ ដោយបានបំបែកបណ្តាញឥទ្ធិពលរបស់អ៊ីរ៉ង់នៅតំបន់មជ្ឈិមបូព៌ា ប៉ុន្តែពេលនេះ អ៊ីស្រាអែល សហរដ្ឋអាមេរិក និងមហាអំណាចអារ៉ាប់ ត្រូវតែដោះស្រាយជាមួយនឹងហានិភ័យនៃអស្ថិរភាព និងភាពជ្រុលនិយមពីកងកម្លាំងដែលជំនួសលោក Assad ។

ក្រុមរដ្ឋអ៊ីស្លាមក្នុងឆ្នាំ ២០១៤ បានវាយលុកនៅទូទាំងប្រទេសស៊ីរី និងអ៊ីរ៉ាក់ ហើយបានបង្កើតរដ្ឋអ៊ីស្លាម មុនពេលក្រុមនេះត្រូវបានបណ្តេញចេញដោយក្រុមចម្រុះដឹកនាំដោយសហរដ្ឋអាមេរិក នៅឆ្នាំ២០១៩។