អាជ្ញាធរការពារជាតិតៃវ៉ាន់បាននិយាយកាលពីថ្ងៃចន្ទដើមសប្ដាហ៍នេះថា ទម្រង់ជាច្រើននៃកងនាវាចរ និងនាវាឆ្មាំល្បាតឆ្នេររបស់ចិនកំពុងធ្វើសកម្មភាពនៅក្នុងដែនទឹកជុំវិញច្រកសមុទ្រតៃវ៉ាន់ និងប៉ាស៊ីហ្វិកខាងលិច ខណៈកោះនេះ កំពុងតាមដានសមយុទ្ធយោធាដ៏ធំ ដោយទីក្រុងប៉េកាំង។  

កោះតៃវ៉ាន់បានឲ្យដឹងក្នុងសេចក្តីថ្លែងការណ៍មួយថា កងកម្លាំងប្រដាប់អាវុធរបស់តៃវ៉ាន់បានកំណត់អត្តសញ្ញាណនាវាកងទ័ពរំដោះប្រជាជនចិន (PLA) ពីទីបញ្ជាការភូមិភាគខាងកើត ខាងជើង និងខាងត្បូង ក៏ដូចជានាវាឆ្មាំល្បាតឆ្នេរដែលចូលមកតំបន់នានា។

សកម្មភាពយោធានេះ កើតឡើងប៉ុន្មានថ្ងៃ បន្ទាប់ពីមេដឹកនាំកោះតៃវ៉ាន់លោក ឡៃ ឆីង -ទ (Lai Ching-te) បានធ្វើឲ្យទីក្រុងប៉េកាំងខឹងសម្បារដោយសារតែការឈប់សំចតមិនផ្លូវការនៅរដ្ឋ ហាវ៉ៃ និងកោះហ្គាំ(Guam)របស់សហរដ្ឋអាមេរិក អំឡុងពេលដំណើរទស្សនកិច្ចនៅតំបន់ប៉ាស៊ីហ្វិកខាងត្បូងរយៈពេលមួយសប្តាហ៍ ដែលបានបញ្ចប់កាលពីថ្ងៃសុក្រសប្ដាហ៍មុន។  

ក្រុមអាជ្ញាធរចិន ប្រឆាំងយ៉ាងខ្លាំងចំពោះដំណើររបស់លោក Lai ដោយចាត់ទុករូបលោកជាជនបំបែកខ្លួន។ ដំណើរទស្សនកិច្ចរបស់លោក Lai បានកើតឡើងបន្ទាប់ពីសហរដ្ឋអាមេរិកបានអនុម័តការលក់សព្វាវុធថ្មីទៅឲ្យកោះតៃវ៉ាន់ ដែលបានជំរុញឱ្យប្រទេសចិនប្ដេជ្ញាចាត់វិធានការប្រឆាំងយ៉ាងម៉ឺងម៉ាត់។

មេដឹកនាំរបស់កោះតៃវ៉ាន់ បានច្រានចោលការអះអាងសិទ្ធិគ្រប់គ្រងលើកោះនេះថាជាដែនដីរបស់ចិន ខណៈទីក្រុងប៉េកាំងបានប្តេជ្ញាបង្រួបបង្រួមជាមួយកោះនេះ ហើយពុំដែលច្រានចោលការប្រើកម្លាំងក្រសោបយកកោះនេះនោះទេ។  

ក្រុមអាជ្ញាធរការពារជាតិរបស់កោះតៃវ៉ាន់កាលពីថ្ងៃចន្ទក៏បាននិយាយផងដែរថាខ្លួនបានចាប់ផ្តើមសមយុទ្ធត្រៀមប្រយុទ្ធ ទប់ទល់នឹងសកម្មភាពរបស់កងទ័ពរំដោះប្រជាជនចិន ហើយនៅតែមានការប្រុងប្រយ័ត្នខ្ពស់ក្នុងការតាមដានសកម្មភាពយោធារបស់ចិន៕