កាលពីយប់ថ្ងៃចន្ទ ទី៩ ខែធ្នូសប្ដាហ៍នេះក្រុមបាតុកររាប់ពាន់នាក់នៅទីក្រុងសេអ៊ូល បានប្រឹងជម្នះនឹងភាពត្រជាក់ម្តងទៀត ដើម្បីទាមទារឱ្យប្រធានាធិបតីកូរ៉េខាងត្បូង លោក Yoon Suk Yeol ត្រូវបានចោទប្រកាន់ទម្លាក់តំណែង ដោយនិយាយថា មិនគ្រប់គ្រាន់ទេត្រឹមតែការសុំទោស ចំពោះការព្យាយាមដាក់ច្បាប់អាជ្ញាសឹកកាលពីសប្តាហ៍មុននោះ។

លោក Yoon បានគេចផុតពីការបោះឆ្នោតចោទប្រកាន់ទម្លាក់តំណែងក្នុងសភាកាលពីថ្ងៃសៅរ៍៧ធ្នូ បន្ទាប់ពីការប៉ុនប៉ងដ៏ខុសឆ្គងរបស់លោកក្នុងការដាក់ច្បាប់អាជ្ញាសឹកកាលពីថ្ងៃអង្គារទី៣ធ្នូសប្ដាហ៍មុន ហើយក្រោយមកប្រជាជនកូរ៉េខាងត្បូងរាប់ម៉ឺននាក់បានប្រមូលផ្តុំគ្នាទាមទារឱ្យរូបលោកលាលែងពីតំណែង។

សហភាពសហព័ន្ធសហជីពកូរ៉េ (KCTU) ដែលបានដឹកនាំការតវ៉ាកាលពីយប់ថ្ងៃចន្ទដើមសប្ដាហ៍នេះ បានប៉ាន់ប្រមាណថា មនុស្សប្រហែល ៣០.០០០នាក់ បានប្រមូលផ្តុំគ្នាម្តងទៀតនៅជិតសភា។

ក្រុមអ្នកតវ៉ាបានសម្តែងការខឹងសម្បារ និងខកចិត្តចំពោះសេចក្តីថ្លែងការណ៍ចុងក្រោយរបស់លោក Yoon ជាទីដែលលោកបាននិយាយថាលោកនឹងប្រគល់ជោគវាសនានយោបាយ និងផ្លូវច្បាប់របស់លោកទៅឱ្យគណបក្សអំណាចប្រជាជន (PPP) ដែលកំពុងកាន់អំណាចរបស់លោក ប៉ុន្តែពុំបានលាលែងពីតំណែងនោះទេ។

លោក Yoonវ័យ៦៣ឆ្នាំ រដ្ឋមន្ត្រីខុទ្ទកាល័យ មេបញ្ជាការយោធា និងមន្ត្រីនគរបាល ជាច្រើនរូប ប្រឈមការស៊ើបអង្កេតបទឧក្រិដ្ឋជុំវិញការចោទប្រកាន់ពីបទក្បត់ជាតិ និងបំពានអំណាច។ មន្ត្រីក្រសួងយុត្តិធម៌និយាយថា ប្រធានាធិបតីរូបនេះ ត្រូវបានហាមប្រាមមិនឲ្យធ្វើដំណើរចេញក្រៅប្រទេស ជុំវិញការប៉ុនប៉ងបរាជ័យដាក់ច្បាប់អាជ្ញាសឹក ខណៈការស៊ើបអង្កេតកំពុងបន្ត៕