ប្រជាជនស៊ីរីក្នុងទីក្រុងដាម៉ាស បានតម្រង់ជួរ នៅខាងមុខហាងនំប៉័ង និងមជ្ឈមណ្ឌលចែកចាយឧស្ម័ន បន្ទាប់ពីយុគសម័យថ្មីនៅក្នុងប្រទេសស៊ីរីគ្មានប្រធានាធិបតី លោក Bashar al-Assad ។

ទីក្រុងដាម៉ាស បានវិលត្រឡប់មករកជីវិតធម្មតាវិញកាលពីថ្ងៃចន្ទ ក្នុងពេលចាប់ផ្តើមក្តីសង្ឃឹម ប៉ុន្តែក្នុងយុគសម័យមិនប្រាកដប្រជា បន្ទាប់ពីក្រុមឧទ្ទាមបានដណ្តើមយករដ្ឋធានី ហើយលោក Assad បានភៀសខ្លួនចេញទៅកាន់ប្រទេសរុស្ស៊ី បន្ទាប់ពីសង្គ្រាមស៊ីវិលរយៈពេល១៣ ឆ្នាំ។

ចរាចរណ៍មមាញឹក បានវិលមកវិញនៅលើដងផ្លូវនានា ហើយប្រជាជនបានចេញទៅខាងក្រៅ បន្ទាប់ពីបម្រាមគោចរនៅពេលយប់ ប៉ុន្តែហាងភាគច្រើននៅតែបិទ។

មេបញ្ជាការក្រុមឧទ្ទាមលោក Ahmed al-Sharaa ដែលគេស្គាល់ច្បាស់ថា Abu Mohammed al-Golani បានជួបជាមួយនាយករដ្ឋមន្ត្រីរបស់លោក Assad លោក Mohammed Jalali កាលពីពេលយប់ និងអនុប្រធានាធិបតី លោក Faisal Mekdad ដើម្បីពិភាក្សាអំពីការរៀបចំសម្រាប់រដ្ឋាភិបាលអន្តរកាល។

យោងតាមប្រភពព័ត៌មានពីធនាគារកណ្តាលស៊ីរី និងធនាគារពាណិជ្ជ បានឱ្យដឹងថា ធនាគាររបស់ប្រទេសស៊ីរី នឹងបើកឡើងវិញ នៅថ្ងៃអង្គារ ទី១០ ខែធ្នូនេះ ហើយបុគ្គលិកត្រូវបានស្នើសុំឱ្យវិលត្រឡប់ទៅការិយាល័យវិញ។ ពួកគេបាននិយាយថា រូបិយប័ណ្ណរបស់ប្រទេសស៊ីរី នឹងបន្តប្រើប្រាស់។