បណ្តាប្រទេសនៅអឺរ៉ុប បានផ្អាកដំណើរការនៃពាក្យសុំសិទ្ធិជ្រកកោនដែលត្រូវបានបញ្ជូនមកដោយជនភៀសខ្លួនស៊ីរី។ ការផ្អាកនេះកើតមានឡើងបន្ទាប់ពីការដួលរលំរដ្ឋាភិបាលរបស់ប្រធានាធិបតី លោក Bashar al-Assad ក្នុងប្រទេសស៊ីរី។

ប្រទេសអាល្លឺម៉ង់ បានប្រកាសកាលពីថ្ងៃចន្ទថា ខ្លួនបានផ្អាកការសម្រេចចិត្តលើនីតិវិធីសុំសិទ្ធជ្រកកោន ទាក់ទងនឹងជនភៀសខ្លួនស៊ីរី។ ប្រទេសអាល្លឺម៉ង់ គឺជាប្រទេសដែលផ្តល់ទីជ្រកកោនដល់ប្រជាជនច្រើនជាងគេមានដើមកំណើតស៊ីរី នៅខាងក្រៅប្រទេសស៊ីរី។

រដ្ឋមន្ត្រីក្រសួងមហាផ្ទៃអាល្លឺម៉ង់ លោកស្រី Nancy Faeser បានចេញសេចក្តីថ្លែងការណ៍មួយ ដោយលោកស្រីនិយាយថា ជនភៀសខ្លួនជាច្រើនដែលបានស្វែងរកការការពារនៅក្នុងប្រទេសអាល្លឺម៉ង់ពេលនេះមានក្តីសង្ឃឹមក្នុងការវិលត្រឡប់ទៅប្រទេសកំណើតស៊ីរីរបស់ពួកគេវិញ។ លោកស្រីនិយាយ ថា «ទោះជាយ៉ាងណា ស្ថានភាពនៅក្នុងប្រទេសស៊ីរី បច្ចុប្បន្នមិនច្បាស់លាស់នោះទេ»។

រដ្ឋមន្ត្រីរូបនេះ បាននិយាយថា អាជ្ញាធរប្រទេសអាល្លឺម៉ង់បាន «ផ្អាកការសម្រេច លើនីតិវិធីសុំសិទ្ធិជ្រកកោនដែលនៅបន្តរហូតដល់ស្ថានភាពប្រាកដប្រជាជាងនេះ»។

ចក្រភពអង់គ្លេស និងប្រទេសបែលហ្សិក ក៏បានសម្រេចចិត្តផ្អាកដំណើរការពាក្យសុំសិទ្ធិជ្រកកោនដែលដាក់ស្នើដោយពលរដ្ឋស៊ីរីផងដែរ។

ប្រទេសស៊ុយអែត និងបារាំង ក៏ត្រូវបានគេរំពឹងថានឹងមានចំណាត់ការស្រដៀងគ្នានៅប៉ុន្មានថ្ងៃខាងមុខនេះ។

ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន លោក Filippo Grandi បានចេញសេចក្តីថ្លែងការណ៍មួយកាលពីថ្ងៃចន្ទថា ជនភៀសខ្លួនស៊ីរីរាប់លាននាក់កំពុងវាយតម្លៃយ៉ាងប្រុងប្រយ័ត្នថាតើ វាមានសុវត្ថិភាពប៉ុណ្ណាក្នុងការវិលត្រឡប់ទៅកាន់ប្រទេសរបស់ពួកគេវិញ។