អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសអំពើហិង្សារបស់ក្រុមជនអន្ធពាលដែលនៅតែបន្ត បណ្តាលឲ្យមនុស្សជាច្រើននាក់បាត់បង់ជីវិតនៅក្នុងប្រទេសហៃទី ហើយបានអំពាវនាវឱ្យមានការស៊ើបអង្កេតឱ្យបានហ្មត់ចត់។

លោក Stephane Dujarric អ្នកនាំពាក្យរបស់ប្រមុខអង្គការសហប្រជាជាតិ បាននិយាយថា លោក Guterres ថ្កោលទោសយ៉ាងដាច់ខាតចំពោះអំពើហិង្សារបស់ក្រុមជនអន្ធពាល និងការបាត់បង់អាយុជីវិតប្រជាជននៅក្នុងប្រទេសហៃទី ដែលក្រុមជនអន្ធពាលប្រដាប់អាវុធត្រូវបានគេរាយការណ៍ថាបានសម្លាប់មនុស្សយ៉ាងហោចណាស់១៨៤នាក់ រួមមានបុរសនិងស្ត្រីវ័យចំណាស់១២៧នាក់ នៅចន្លោះពីថ្ងៃទី៦ និងថ្ងៃទី៨ ខែធ្នូ ។

លោកអគ្គលេខាធិកា បានអំពាវនាវឱ្យអាជ្ញាធរប្រទេសហៃទី ធ្វើការស៊ើបអង្កេតឱ្យបានហ្មត់ចត់ និងធានាបានថា អ្នកប្រព្រឹត្ត និងការរំលោភបំពានសិទ្ធិមនុស្សផ្សេងទៀតទាំងអស់ ត្រូវតែបាននាំមកកាត់ទោស។

លោក Guterres បានបញ្ជាក់ជាថ្មីនូវការអំពាវនាវរបស់លោកទៅកាន់រដ្ឋជាសមាជិក ដើម្បីផ្តល់បេសកកម្មគាំទ្រសន្តិសុខពហុជាតិសាសន៍ នូវការគាំទ្រផ្នែកហិរញ្ញវត្ថុ និងការដឹកជញ្ជូនដែលត្រូវការ ដើម្បីជួយដល់នគរបាលជាតិហៃទី ឲ្យទទួលបានជោគជ័យក្នុងការដោះស្រាយអំពើហិង្សារបស់ក្រុមជនអន្ធពាល។