អាជ្ញាធរការពារជាតិកោះតៃវ៉ាន់ បាននិយាយនៅថ្ងៃអង្គារនេះថា ប្រទេសចិនកំពុងដាក់ពង្រាយកងនាវារបស់កងទ័ពជើងទឹកច្រើនបំផុតរបស់ខ្លួននៅលើដែនទឹកក្នុងតំបន់ ក្នុងរយៈពេលជិត៣ទសវត្សរ៍ មកនេះ បង្កការគំរាមកំហែងដល់កោះតៃវ៉ាន់ដែលត្រូវបានមើលឃើញកាន់តែច្បាស់ជាងហ្គេមសង្គ្រាមមុនៗរបស់ចិន។

ថ្លែងនៅក្នុងទីក្រុងតៃប៉ិ អ្នកនាំពាក្យអាជ្ញាធរការពារជាតិ លោក Sun Li-fang បាននិយាយថា ទំហំនៃការដាក់ពង្រាយកងទ័ពជើងទឹកចិនបច្ចុប្បន្ននៅក្នុងតំបន់ដែលលាតសន្ធឹងពីកោះភាគខាងត្បូងរបស់ប្រទេសជប៉ុន ទៅដល់សមុទ្រចិនខាងត្បូង គឺជាទំហំធំបំផុត ចាប់តាំងពីប្រទេសចិន បានរៀបចំហ្គេមសង្គ្រាមនៅជុំវិញកោះតៃវ៉ាន់ មុនការបោះឆ្នោតមេដឹកនាំកោះតៃវ៉ាន់ ឆ្នាំ១៩៩៦។

ប្រទេសចិន ដែលបានចាត់ទុកកោះតៃវ៉ាន់គ្រប់គ្រងតាមបែបលទ្ធិប្រជាធិបតេយ្យជាដែនដីរបស់ខ្លួន ជុំវិញការបដិសេធរបស់កោះនេះ ត្រូវបានគេរំពឹងថានឹងចាប់ផ្តើមសមយុទ្ធដើម្បីបង្ហាញពីកំហឹងរបស់ខ្លួនចំពោះដំណើរទស្សនកិច្ចរបស់មេដឹកនាំ លោក លៃ ឆឹងតឺ(Lai Ching-te) ទៅកាន់មហាសមុទ្រប៉ាស៊ីហ្វិក ដែលបានបញ្ចប់ទៅកាលពីថ្ងៃសុក្រ ដែលរួមមានការឈប់ចតនៅកោះហាវ៉ៃ និងទឹកដីកោះហ្គាំរបស់សហរដ្ឋអាមេរិក។