ក្រុមមនុស្សធម៌របស់អង្គការសហប្រជាជាតិកាលពីថ្ងៃចន្ទ បានពណ៌នាស្ថានភាពនៅក្នុងប្រទេសស៊ីរីថាមានភាពវឹកវរនិងគ្មានស្ថិរភាព ដោយមានប្រជាជនជាង ១៦លាននាក់ នៅក្នុងប្រទេសនេះ កំពុងត្រូវការ ជំនួយ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា មនុស្ស ១ លាននាក់ ត្រូវបានផ្លាស់ទីលំនៅពីផ្ទះសម្បែងរបស់ពួកគេ នៅភាគខាងលិច និងភាគពា យ័ព្យ ចាប់ពីថ្ងៃទី ២៨ ខែវិច្ឆិកាដល់ថ្ងៃទី ០៨ ខែធ្នូ។ ពួកគេ ត្រូវការបន្ទាន់នូវទីជម្រក អាហារ និងសម្ភារៈអនាម័យ»។

ការិយាល័យនេះ បានឲ្យដឹងថា អ្នកដែលត្រូវផ្លាស់ទីលំនៅថ្មីៗ ភាគច្រើនជាស្ត្រី និងកុមារមកពីក្រុង Aleppo Hama, Homs និង ខេត្ត Idlib ។ ស្ថានការណ៍ ពុំមានស្ថិរភាព ដោយមានរបាយការណ៍ថា មានមនុស្សកាន់តែច្រើនត្រឡប់មកវិញ ក្នុងរយៈពេលពីរបីថ្ងៃចុងក្រោយនេះ។ ផ្លូវដឹកជញ្ជូននានា ត្រូវបានបង្អាក់ ដោយកំណត់ការធ្វើដំណើររបស់ប្រជាជន ទំនិញ និងជំនួយមនុស្សធម៌។

យោងតាម OCHA បានឲ្យដឹងថា ការលួចទ្រព្យសម្បត្តិជនស៊ីវិល និងរោងចក្រមួយចំនួន ក៏ដូចជាឃ្លាំងផ្ទុកសម្ភារៈមនុស្សធម៌ ត្រូវបានគេរាយការណ៍។

OCHA បាននិយាយថា៖«ទោះបីជាមានបញ្ហាប្រឈម និងស្ថានភាពប្រែប្រួលក៏ដោយ យើងនិងដៃគូរបស់យើង នៅតែបន្តផ្តល់ជំនួយសង្គ្រោះបន្ទាន់»។

ការិយាល័យនេះ បានបន្ថែមថា នៅភាគពាយព្យនៃប្រទេសស៊ីរី អង្គការមនុស្សធម៌ទាំងអស់ នៅក្នុងខេត្ត Idlib និងភាគខាងជើងទីក្រុង Aleppo បានបន្តប្រតិបត្តិការធម្មតាឡើងវិញ ហើយច្រកព្រំដែនចំនួនបីពី ប្រទេសទួរគី ដែលប្រើដើម្បីផ្តល់ជំនួយទៅកាន់ប្រទេសស៊ីរី នៅតែបើកចំហ។