គណបក្សប្រឆាំងដ៏សំខាន់របស់កូរ៉េខាងត្បូង នៅថ្ងៃអង្គារ (ទី១០ ខែធ្នូ) បានប្រាប់ឲ្យដឹងថា ខ្លួននឹងអនុម័តសេចក្ដីស្នើច្បាប់ថវិការបស់រដ្ឋាភិបាល សម្រាប់ឆ្នាំ២០២៥ ជាសំណើដែលបង្កឲ្យមានការចេញក្រឹត្យច្បាប់អាជ្ញាសឹករបស់លោកប្រធានាធិបតី Yoon Suk Yeol កាលពីសប្តាហ៍មុន នៅក្នុងសម័យប្រជុំពេញអង្គ ដែលគ្រោងនឹងធ្វើឡើងនៅយប់ថ្ងៃនេះ។

សភាដែលគ្រប់គ្រងដោយគណបក្សប្រឆាំង កាលពីខែមុន បានកាត់បន្ថយថវិកាចំនួន ៤,១សែនកោដិវ៉ុន ពីកញ្ចប់ថវិកាដែលត្រូវបានស្នើឡើងដោយរដ្ឋាភិបាលចំនួន ៦៧៧.៤សែនកោដិវ៉ុន (៤៧៣ពាន់លានដុល្លារ)។

ប្រធានគណបក្សប្រជាធិបតេយ្យ លោក Lee Jae-myung បាននិយាយថា៖ «យើងនឹងអនុម័តច្បាប់ថវិកានៅថ្ងៃនេះ។ ការអនុម័តយ៉ាងឆាប់រហ័សលើសេចក្ដីស្នើច្បាប់នេះ នឹងជួយដោះស្រាយភាពមិនសប្បាយចិត្តនិងវិបត្តិ នាពេលនេះ»។

រដ្ឋាភិបាលលើកឡើងថា ការកាត់បន្ថយកម្រិតថវិកានឹងធ្វើឲ្យប៉ះពាល់ដល់មុខងារជាមូលដ្ឋានរបស់រដ្ឋាភិបាល រារាំងការឆ្លើយតប ចំពោះបញ្ហាប្រឈមខាងក្រៅ និងពន្យារពេលវិធានការគោលនយោបាយ សម្រាប់អាជីវកម្មខ្នាតតូច និងងាយរងគ្រោះ។

គួររំលឹកថា លោកប្រធានាធិបតី Yoon បានយកការរារាំងរបស់គណបក្សប្រឆាំង ជុំវិញបញ្ហាកញ្ចប់ថវិការបស់រដ្ឋាភិបាល ជាហេតុផល ដើម្បីចេញក្រឹត្យច្បាប់អាជ្ញាសឹក កាលពីថ្ងៃទី៣ ខែធ្នូ ដែលបានបង្កឲ្យមានវិបត្តិរដ្ឋធម្មនុញ្ញ នៅក្នុងប្រទេសសេដ្ឋកិច្ចធំបំផុតទី៤ របស់តំបន់អាស៊ី៕