ប្រទេសអាល្លឺម៉ង់ អង់គ្លេស និងបារាំង កាលពីថ្ងៃចន្ទ (ទី៩ ខែធ្នូ) បាននិយាយថា ពួកគេមាន «ការព្រួយបារម្ភយ៉ាងខ្លាំង» ដែលអ៊ីរ៉ងពន្លឿនសមត្ថភាពរបស់ខ្លួន ក្នុងការចម្រាញ់សារធាតុអ៊ុយរ៉ានីញ៉ូម ដោយជំរុញឲ្យអ៊ីរ៉ង់បញ្ឈប់ និងផ្លាស់ប្តូរជំហានទាំងនេះ។

គួរបញ្ជាក់ថា កាលពីថ្ងៃសុក្រសប្ដាហ៍មុន ប្រធានទីភ្នាក់ងារថាមពលអាតូមិកអន្តរជាតិ (IAEA) របស់អង្គការសហប្រជាជាតិ (UN) លោក Rafael Grossi បានប្រាប់សារព័ត៌មាន Reuters ថា អ៊ីរ៉ង់កំពុងពន្លឿនការចម្រាញ់សារធាតុអ៊ុយរ៉ានីញ៉ូមរបស់ខ្លួនរហូតដល់កម្រិតសុទ្ធ ៦០ភាគរយ ដោយឡើងដល់បរិមាណនៃកម្រិតប្រហែល ៩០ភាគរយ ដែលជាកម្រិតអាវុធ។

ការចម្រាញ់នេះ បានចម្រាញ់វត្ថុធាតុដើម ដើម្បីឲ្យប្រទេសនេះអាចប្រើជាឥន្ធនៈ ក្នុងការផលិតថាមពលនុយក្លេអ៊ែរស៊ីវិល ឬអាចជាអាវុធនុយក្លេអ៊ែរ។ អ៊ីរ៉ង់បានបដិសេធជាយូរមកហើយថា ខ្លួនមិនបានស្វែងរកអាវុធនុយក្លេអ៊ែរនោះទេ។

ប្រទេសអាល្លឺម៉ង់ អង់គ្លេស និងបារាំង ដែលគេស្គាល់ក្រៅផ្លូវការថា E3 បានលើកឡើងនៅក្នុងសេចក្តីថ្លែងការណ៍រួមថា ពួកគេបានថ្កោលទោសជំហានចុងក្រោយបង្អស់របស់អ៊ីរ៉ង់ ក្នុងការបង្កើនយ៉ាងខ្លាំងក្លានូវអត្រានៃការផលិតនូវសារធាតុអ៊ុយរ៉ានីញ៉ូម ដែលចម្រាញ់បានរហូតដល់ ៦០ភាគរយ នៅឯរោងចក្រក្រោមដី Fordow។

ប្រទេសទាំង៣ បានបន្ថែមថា សកម្មភាពរបស់អ៊ីរ៉ង់ បានធ្វើឲ្យកិច្ចព្រមព្រៀងនុយក្លេអ៊ែឆ្នាំ២០១៥ កាន់តែអាក្រក់ទៅៗ ហើយនឹងបង្កើនការស្តុកសារធាតុអ៊ុយរ៉ានីញ៉ូមចម្រាញ់ហើយកម្រិតខ្ពស់របស់អ៊ីរ៉ង់ ដែលមិនមាន «យុត្តិកម្មស៊ីវិលគួរឲ្យទុកចិត្ត» រួចទៅហើយនោះ៕