រដ្ឋាភិបាលរបស់នាយករដ្ឋមន្រ្តីកាណាដា លោក Justin Trudeau កាលពីថ្ងៃចន្ទ (ទី៩ ខែធ្នូ) បានរួចផុតមិនធ្លាក់ពីការបោះឆ្នោតទុកសេចក្ដីទុកចិត្តលើកទី៣ ក្នុងរយៈពេល ៣ខែនេះ ជាញត្តិដែលលើកដោយគូប្រជែងដ៏សំខាន់របស់លោក គឺក្រុមអភិរក្សនិយម។

រដ្ឋាភិបាលសេរីនិយមដែលមានសំឡេងភាគតិច បានទទួលការគាំទ្រពីគណបក្សប្រជាធិបតេយ្យថ្មី (NDP) ជាក្រុមឆ្វេងនិយមតូចមួយដែលធ្លាប់ជាសម្ព័ន្ធដ៏ជិតស្និទ្ធជាមួយគណបក្សសេរីនិយម ដែលកំពុងកាន់អំណាច ដើម្បីទម្លាក់ញត្តិនេះជាមួយនឹងសំឡេង ១៨០ ទល់នឹង ១៥២។

អត្ថបទនៃសំណើនេះ បានបន្ទរតាមការរិះគន់ផ្ទាល់ខ្លួនកាលពីអតីតរបស់មេដឹកនាំគណបក្ស NDP គឺលោក Jagmeet Singh លើលោក Trudeau ចាប់តាំងពីពួកគេបានផ្តាច់ទំនាក់ទំនង កាលពីចុងខែសីហា ដោយហៅលោកថា "«ខ្សោយពេក អាត្មានិយមពេក»។ ទាំងលោក Singh និងលោក Trudeau មិនមានវត្តមាន សម្រាប់ការបោះឆ្នោតនោះទេ។

គួរបញ្ជាក់ថា ការបោះឆ្នោតដកសេចក្ដីទុកចិត្តចំនួន ២ដង ដែលលើកមកដោយក្រុមអភិរក្សនិយម ក្នុងខែកញ្ញា និងខែតុលា បានបរាជ័យ នៅពេលដែលគណបក្ស NDP និងក្រុមបំបែកខ្លួន Bloc Quebecois គាំទ្រក្រុមសេរីនិយម។

នៅក្នុងប្រព័ន្ធសភារបស់ប្រទេសកាណាដា គណបក្សកាន់អំណាចត្រូវតែទទួលបានសេចក្ដីទុកចិត្តពីសភា ដែលមានន័យថា រក្សាការគាំទ្រពីសមាជិកភាគច្រើន។ បច្ចុប្បន្នក្រុមសេរីនិយម មាន ១៥៣អាសនៈ ធៀបនឹង ១១៩អាសនៈ របស់ក្រុមអភិរក្ស ៣៣អាសនៈ សម្រាប់គណបក្ស Bloc Quebecois និង ២៥អាសនៈរបស់គណបក្ស NDP៕