អ៊ីស្រាអែល នៅថ្ងៃអង្គារ (ទី១០ ខែធ្នូរ) នេះ បានបដិសេធថា កងកម្លាំងរបស់ខ្លួនមិនបានឆ្លងចូលទៅក្នុងដែនដីស៊ីរី ហួសតំបន់ទ្រនាប់ជាមួយនឹងតំបន់ Golan Heights ដែលកាន់កាប់ដោយអ៊ីស្រាអែល បន្ទាប់ពីប្រភពស៊ីរី បាននិយាយថា ការលុកលុយបានលាតសន្ធឹងដល់ចម្ងាយ ២៥គីឡូម៉ែត្រនៃរដ្ឋធានីដាម៉ាស។

គួរបញ្ជាក់ថា ទាហានអ៊ីស្រាអែលបានផ្លាស់ទៅតំបន់ទ្រនាប់ដែលត្រូវបានបង្កើតឡើង បន្ទាប់ពីសង្រ្គាមមជ្ឈិមបូព៌ាឆ្នាំ១៩៧៣ ខណៈរដ្ឋាភិបាលរបស់ប្រធានាធិបតីស៊ីរី លោក Bashar al-Assad បានដួលរលំនៅចុងសប្តាហ៍ ដោយសារកម្លាំងក្រុមឧទ្ទាមដែលរុលទៅមុខពីភាគខាងជើង។

ចំណាត់ការរបស់អ៊ីស្រាអែល អមដោយការវាយប្រហារតាមអាកាសជាបន្តបន្ទាប់ បានឃើញកងកម្លាំងពិសេសរឹបអូសបានទីតាំងឈរជើងដែលបោះបង់ចោល នៅផ្នែកនៃតំបន់ភ្នំ Hermon របស់ស៊ីរី ជាចំណុចយុទ្ធសាស្ត្រដែលអាចមើលឃើញរដ្ឋធានីស៊ីរី ជាក្នុងអ្វីដែលមន្ត្រីអ៊ីស្រាអែលហៅថា ជាវិធានការមានកំណត់ និងបណ្តោះអាសន្ន ដើម្បីធានាសន្តិសុខ នៅតាមព្រំដែនរបស់ប្រទេសទាំង២។

ប្រភពសន្តិសុខស៊ីរីមួយ បានឲ្យដឹងថា ទាហានអ៊ីស្រាអែលបានទៅដល់ទីក្រុងតូច Qatana នៅភាគនិរតីនៃទីក្រុងដាម៉ាស ឆ្ពោះទៅភាគខាងកើតនៃតំបន់គ្មានយោធា ប៉ុន្តែអ្នកនាំពាក្យយោធាអ៊ីស្រាអែល បានបដិសេធការលើកឡើងនេះ។

អ៊ីស្រាអែលបានស្វាគមន៍ការដួលរលំរបបរបស់លោក Assad ដែលជាសម្ព័ន្ធមិត្តរបស់សត្រូវដ៏ធំរបស់ខ្លួន គឺអ៊ីរ៉ង់ ប៉ុន្តែបានប្រតិកម្មយ៉ាងប្រុងប្រយ័ត្ន ចំពោះក្រុមឧទ្ទាមនាំមុខគេ គឺ Hayat Tahrir al-Sham (HTS) ដែលមានឫសគល់ចេញពីចលនាអ៊ិស្លាម ដែលរួមមានទាំងក្រុមអាល់កៃដា និងរដ្ឋអ៊ីស្លាមផងដែរ។ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទថា អ៊ីស្រាអែលនឹងប្រើប្រាស់គ្រឿងយុទ្ធោបករណ៍ទាំងអស់ដែលខ្លួនមាន ដើម្បីធានាសន្តិសុខរបស់ប្រទេស បន្ទាប់ពីលោក Assad ត្រូវបានទម្លាក់ពីអំណាច៕