សភាដែលគ្រប់គ្រងដោយគណបក្សប្រឆាំងរបស់ប្រទេសកូរ៉េខាងត្បូង នៅថ្ងៃអង្គារ (ទី១០ ខែធ្នូ) នេះ បានអនុម័តសេចក្ដីស្នើច្បាប់ថវិការដ្ឋាភិបាល សម្រាប់ឆ្នាំ២០២៥ ដែលត្រូវបានកាត់បន្ថយពីសំណើរបស់រដ្ឋាភិបាល និងដែលបានបង្កឲ្យមានការចេញក្រឹត្យច្បាប់អាជ្ញាសឹករយៈពេលខ្លីរបស់លោកប្រធានាធិបតី Yoon Suk Yeol កាលពីសប្តាហ៍មុន។

សភាដែលមានសមាជិក ៣០០នាក់ បានបោះឆ្នោតដោយសំឡេង ១៨៣ ទល់នឹង៩៤ ដើម្បីអនុម័តកញ្ចប់ថវិកាចំនួន ៦៧៣សែនកោដិវ៉ុន (៤៧០ពាន់លានដុល្លារ) សម្រាប់ឆ្នាំ២០២៥ ដែលជាចំនួនត្រូវបានកាត់បន្ថយដោយគណបក្សប្រជាធិបតេយ្យ ពីកម្រិតដែលបានស្នើឡើងរបស់រដ្ឋាភិបាលចំនួន ៦៧៧,៤សែនកោដិវ៉ុន។ នេះជាការឆ្លងសេចក្ដីស្នើច្បាប់ដោយមិនបានឈានដល់ការព្រមព្រៀងជាមួយគណបក្សអំណាចប្រជាជន (PPP) ដែលកំពុងកាន់អំណាច និងរដ្ឋាភិបាល។

ហើយនេះក៏ជាលើកទី១ ដែរ ដែលសភាអនុម័តកញ្ចប់ថវិកាដែលត្រូវបានកាត់បន្ថយ ដោយគ្មានការយល់ព្រមពីក្រសួងរដ្ឋាភិបាល ឬរវាងគណបក្សគូប្រជែង។ សមាជិកសភានឹងត្រូវការការយល់ព្រមពីក្រសួងហិរញ្ញវត្ថុ ដើម្បីធ្វើការកែប្រែលើការចំណាយរបស់រដ្ឋាភិបាល សម្រាប់ឆ្នាំបន្ទាប់។ មេដឹកនាំគណបក្សប្រជាធិបតេយ្យ លោក Lee Jae-myung បាននិយាយថា «ការអនុម័តយ៉ាងឆាប់រហ័សលើច្បាប់នេះ នឹងជួយដោះស្រាយភាពមិនស្ងប់សុខ និងវិបត្តិ នាពេលបច្ចុប្បន្ននេះ»។

រដ្ឋាភិបាលបានលើកឡើងថា ការកាត់បន្ថយកម្រិតថវិកា នឹងធ្វើឲ្យប៉ះពាល់ដល់មុខងារជាមូលដ្ឋានរបស់រដ្ឋាភិបាល រារាំងការឆ្លើយតប ចំពោះបញ្ហាប្រឈមខាងក្រៅ និងពន្យារពេលវិធានការគោលនយោបាយ សម្រាប់អាជីវកម្មខ្នាតតូច និងងាយរងគ្រោះ។

គួររំលឹកថា លោកប្រធានាធិបតី Yoon បានយកការរារាំងរបស់គណបក្សប្រឆាំង ជុំវិញបញ្ហាកញ្ចប់ថវិការបស់រដ្ឋាភិបាល ជាហេតុផល ដើម្បីចេញក្រឹត្យច្បាប់អាជ្ញាសឹក កាលពីថ្ងៃទី៣ ខែធ្នូ ដែលបានបង្កឲ្យមានវិបត្តិរដ្ឋធម្មនុញ្ញ នៅក្នុងប្រទេសសេដ្ឋកិច្ចធំបំផុតទី៤ របស់តំបន់អាស៊ី៕