​បាល់ទាត់៖ ក្រុម​ការពារ​តំណែង​ជើងឯក​ពានរង្វាន់ Carabao Cup, Manchester City បាន​​ធ្លាក់​ចេញពី​ការប្រកួត​ត្រឹម​ជុំ​ទី​៤ ជា​លើកដំបូង​តាំងពី​ឆ្នាំ​២០១៦ ក្រោយ​ចាញ់​នៅ​ទឹកដី West Ham ដោយ​បាល់ ១១ម៉ែត្រ​កាត់សេចក្តី​។

​​ក្រុម​របស់​លោក Pep Guardiola បាន​ផ្លាស់ប្ដូរ ១១នាក់​ដំបូង​ដល់​ទៅ ៩នាក់​មុន​ពេលដែល Phil Foden, Gabriel Jesus និង Jack Grealish ត្រូវបាន​ផ្លាស់ប្តូរ​ចូល​ដើម្បី​រក​ជ័យជំនះ​ក្នុង​ម៉ោង​ធម្មតា ៩០នាទី​។ ទោះជា​មានឱកាស​សម្រុក​ច្រើន​ក៏ដោយ Manchester City ធ្វើ​អ្វី​ក្រុម​ម្ចាស់ផ្ទះ West Ham មិនបាន​ឡើយ​។ ឈានដល់​វគ្គ ១១ម៉ែត្រ​កាត់សេចក្តី Phil Foden ដែល​ផ្លាស់ប្តូរ​ចូល​នោះ​គឺជា​កីឡាករ​ម្នាក់​គត់​ដែល​ស៊ុត ១១ម៉ែត្រ​មិន​ចូល​ខុស​គោលដៅ​។​ Said Benrahma គឺជា​អ្នក​ស៊ុត​សំរេច​គ្រាប់​ចុងក្រោយ​ឱ្យ West Ham យកឈ្នះ Manchester City ៥-៣ បាល់ ១១ម៉ែត្រ​កាត់សេចក្តី​។ West Ham United នៅពេលនេះ​ឡើង​វគ្គ ៨ក្រុម​ចុងក្រោយ​ដែល​នឹងត្រូវ​ចាប់ឆ្នោត​នៅ​ថ្ងៃ​សៅរ៍​ចុង​សប្តាហ៍​នេះ បន្ទាប់ពី​ទំលាក់​ក្រុម​នៅ​ទីក្រុង Manchester ទាំងពីរ​ពោលគឺ​កាលពី​ជុំ​ទី៣ West Ham យកឈ្នះ​នៅ​ទឹកដី Manchester United ១-០​។ ​សូមបញ្ជាក់ថា Manchester City តែងតែ​ឈ្នះ​ពាន Carabao Cup នេះ​រយៈពេល ៤រដូវ​កាល​ជាប់​គ្នា​មកហើយ​។

​ក្រឡេក​មក​មួយគូ​ទៀត Liverpool បាន​បន្តដំណើរ​ទៅមុខទៀត​ក្រោយ​យកឈ្នះ​នៅ​ទឹកដី Preston ២-០​។ ​ពីរ​គ្រាប់​របស់ Liverpool ធ្វើបាន​ដោយ​កីឡាករ​ជប៉ុន Takumi Minamino និង Divock Origi នៅ​វគ្គ​ទី២​។ ១១នាក់​ដំបូង​របស់លោក Jurgen Klopp សំរាប់​ការប្រកួត​យប់​មិញ​មានការ​ផ្លាស់ប្ដូរ​ទាំងស្រុង​ពី ១១នាក់​ដែល​យកឈ្នះ Manchester United ៥-០ នៅ Old Trafford ចុង​សប្តាហ៍​កន្លងទៅ​។ ​លទ្ធផល​ផ្សេងទៀត Spurs យកឈ្នះ​នៅ​ទឹកដី Burnley ១-០ ដោយ​គ្រាប់​បាល់​របស់ Lucas Moura ខណៈ Leicester City យកឈ្នះ Brighton ដោយ​បាល់ ១១ម៉ែត្រ​កាត់សេចក្តី និង Stoke City ចាញ់ Brentford ២-១៕

​អត្ថបទ​៖​នាង សុភា​វុ​ធ