អ្នករាយការណ៍របស់ទីភ្នាក់ងារសារព័ត៌មាន Reuters និងសកម្មជនសិទ្ធិមនុស្ស បានឲ្យដឹងថា នគរបាលកេនយ៉ា បានបាញ់ឧស្ម័នបង្ហូរទឹកភ្នែក និងចាប់ខ្លួនមនុស្សយ៉ាងហោចណាស់ ៣នាក់ នៅថ្ងៃអង្គារ (ទី១០ ខែធ្នូ) ខណៈដែលមនុស្សរាប់រយនាក់ បានតវ៉ា ចំពោះការសម្លាប់ស្ត្រីជាបន្តបន្ទាប់ ដោយបុរស។

មនុស្សរាប់រយនាក់ ដែលភាគច្រើនជាស្ត្រី បានដើរដង្ហែក្នុងរដ្ឋធានីណៃរ៉ូប៊ី ជាកន្លែងដែលពួកគេបានផ្លុំកញ្ចែ និងស្រែកថា «បញ្ឈប់ការសម្លាប់លើស្ត្រី!»។ ពួកគេត្រូវបានបំបែកម្ដងហើយម្ដងទៀត ដោយមន្ត្រីនគរបាលដែលបានបាញ់ឧស្ម័នបង្ហូរទឹកភ្នែកពីរថយន្តបើកទៅមុខ មុននឹងប្រមូលផ្ដុំគ្នាជាថ្មី។

បើយោងតាមវីដេអូដែលបានបង្ហោះនៅលើបណ្ដាញសង្គម បានបង្ហាញថា ការតវ៉ានោះក៏បានកើតឡើងផងដែរ នៅក្នុងទីក្រុង Mombasa និង Lodwar។ បាតុករ នៅទីក្រុងណៃរ៉ូប៊ី ដើរតវ៉ាដោយស្ងប់ស្ងាត់ ហើយគេមិនច្បាស់ទេថា ហេតុអ្វីបានជានគរបាលធ្វើអន្តរាគមន៍។ អ្នកនាំពាក្យនគរបាលជាតិមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

អង្គការលើកលែងទោសអន្តរជាតិ បានឲ្យដឹងនៅក្នុងសេចក្តីថ្លែងការណ៍រួមមួយជាមួយនឹងអង្គការចំនួន ៣ផ្សេងទៀតថា លោក Irungu Houghton នាយកប្រតិបត្តិនៃអង្គការលើកលែងទោសអន្តរជាតិកេនយ៉ា ក៏ស្ថិតក្នុងចំណោមអ្នកត្រូវបានចាប់ខ្លួននោះដែរ។ សេចក្តីថ្លែងការណ៍បានបន្ថែមថា៖ «ការតវ៉ានេះ គឺជាជំហរដ៏ក្លាហានប្រឆាំងនឹងការសម្លាប់ស្ត្រី ការទាមទារឲ្យមានការស៊ើបអង្កេតបន្ទាន់លើឃាតកម្មទាំងនេះ និងការអំពាវនាវឲ្យនាំជនល្មើសមកទទួលខុសត្រូវ ចំពោះការប្រព្រឹត្តិរបស់ពួកគេ។ 

សេចក្ដីថ្លែងការន៍នេះ បានសង្កត់ធ្ងន់ថា៖ «ការឆ្លើយតបដោយហិង្សារបស់នគរបាល គឺជាការវាយប្រហារដោយផ្ទាល់ទៅលើគោលការណ៍ប្រជាធិបតេយ្យរបស់កេនយ៉ា និងសិទ្ធិរបស់ប្រជាពលរដ្ឋនៃប្រទេសនេះ»។

គួរបញ្ជាក់ថា បើយោងតាមសេវានគរបាលជាតិ បានឲ្យដឹងថា រវាងខែសីហា និងខែតុលា យ៉ាងហោចណាស់មានស្ត្រីចំនួន ៩៧នាក់ នៅប្រទេសកេនយ៉ា ត្រូវបានសម្លាប់ ក្នុងអំពើសម្លាប់ស្ត្រីដោយបុរស ជាការសម្លាប់ដោយចេតនា ដែលត្រូវបានជំរុញចិត្តទាក់ទងនឹងយេនឌ័រ៕