អត្តពលកម្ម៖ សហព័ន្ធខ្មែរអត្តពលកម្មស្ម័គ្រចិត្តបានបើកវគ្គបណ្តុះបណ្តាលអាជ្ញាកណ្តាល និងចៅក្រមកីឡាអត្តពលកម្មកម្រិតមូលដ្ឋានឆ្នាំ២០២១ រយៈពេល ៣ថ្ងៃចាប់ពីថ្ងៃទី២៦ ដល់ថ្ងៃទី២៨ ខែតុលានេះដើម្បីពង្រឹង និងចម្រាញ់រកអ្នកមានសមត្ថភាពត្រៀមចូលរួមកាត់សេចក្ដីក្នុងការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
កញ្ញា កែវ មនោរម្យ អគ្គលេខាធិការសហព័ន្ធខ្មែរបានឲ្យដឹងថា វគ្គបណ្ដុះបណ្ដាលនេះធ្វើឡើងតាម Zoom ដោយមានសិក្ខាកាមចូលរួម ៣៧នាក់មកពីវិទ្យាស្ថានជាតិអប់រំកាយ និងកីឡា និងមន្ដ្រីមកពីរាជធានី-ខេត្ត ក្រោមការបង្ហាត់បង្រៀនរបស់គ្រូឧទ្ទេសខ្មែរ ៣រូបរួមមានលោក បូរ ពុធរាត្រី, លោក ដៀន វិបុល និងលោក ឡាក់ ឡុច។ អគ្គលេខាធិការសហព័ន្ធដដែលបន្ដថា វគ្គនេះផ្ដោតលើគោលបំណងសំខាន់ ២ ទី១-ដើម្បីបណ្ដុះបណ្ដាលអាជ្ញាកណ្ដាល និងចៅក្រមកីឡាអត្តពលកម្មដែលមានសមត្ថភាពស្របតាមតម្រូវការ ដើម្បីត្រៀមលក្ខណៈរៀបចំការប្រកួតកីឡាស៊ីហ្គេមឆ្នាំ២០២៣ និងទី២-ដើម្បីជ្រើសរើសអាជ្ញាកណ្ដាល-ចៅក្រម ដែលមានសមត្ថភាពភាសាបរទេស បន្ដចូលរៀនវគ្គអាជ្ញាកណ្ដាល-ចៅក្រមអន្ដរជាតិកម្រិត១ នាពេលឆាប់ៗខាងមុខ។
ឯកឧត្តម សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានសហព័ន្ធបានជំរុញ និងលើកទឹកចិត្តឲ្យសិក្ខាកាមទាំងអស់យកចិត្តទុកដាក់សិក្សាទាំងទ្រឹស្ដី និងបច្ចេកទេស ពិសេសបទបញ្ជាការប្រកួតថ្មីៗដើម្បីមានឱកាសបន្ដរៀននៅវគ្គបណ្ដុះបណ្ដាលកម្រិតអន្ដរជាតិ ហើយមានឱកាសចូលរួមរៀបចំកាត់សេចក្ដីក្នុងការប្រកួតកីឡាស៊ីហ្គេមឆ្នាំ២០២៣ នៅលើទឹកដីរបស់ខ្លួនផ្ទាល់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
