មន្ត្រីការពារជាតិកោះតៃវ៉ាន់កំពុងបង្កើនការព្រួយបារម្ភអំពីការដាក់ពង្រាយនាវាកងទ័ពជើងទឹក និងយន្តហោះយោធារបស់ចិនយ៉ាងច្រើនក្នុងរយៈពេល ២៤ ម៉ោងចុងក្រោយនេះ ដោយនិយាយថា ការសម្ញែងសាច់ដុំខាងយោធានេះអាចនាំឱ្យមានសង្គ្រាមជាយថាហេតុ ខណៈភាពតានតឹងនៅតែបន្តកើនឡើងនៅក្នុងតំបន់។

ក្រុមមន្ត្រីនិយាយថាចិនបានបញ្ជូននាវារាប់សិបគ្រឿង និងយន្តហោះយោធា ៤៧គ្រឿងទៅកាន់ដែនទឹកក្នុងតំបន់ជុំវិញច្រកសមុទ្រតៃវ៉ាន់ ខណៈប្រទេសនេះត្រៀមធ្វើសមយុទ្ធយោធាបន្ទាប់ពីដំណើរទស្សនកិច្ចក្រៅប្រទេសរបស់មេដឹកនាំកោះតៃវ៉ាន់លោក ឡៃ ឆីង -ទ(Lai Ching-te) នាពេលថ្មីៗនេះ ដែលរួមមានដំណើរទស្សនកិច្ចទៅកាន់រដ្ឋ ហាវ៉ៃ និងកោះហ្គាំ (Guam)របស់អាមេរិក។

ដំណើរទស្សនកិច្ចនេះបានកើតឡើងតែប៉ុន្មានសប្តាហ៍ប៉ុណ្ណោះបន្ទាប់ពីសហរដ្ឋអាមេរិកបានអនុម័តកញ្ចប់លក់អាវុធទំហំទឹកប្រាក់២ពាន់លានដុល្លារទៅឱ្យតៃវ៉ាន់ រួមទាំងការបញ្ជូនប្រព័ន្ធមីស៊ីលការពារដែនអាកាសកម្រិតខ្ពស់ដែលត្រូវបានសាកល្បងនៅក្នុងប្រទេសអ៊ុយក្រែន និងប្រព័ន្ធរ៉ាដា។

ជុំវិញស្ថានការណ៍ចុងក្រោយនេះ ឧត្តមសេនីយឯករបស់តៃវ៉ាន់ លោក សេ ជីសេង (Hsieh Jih-sheng)បាននិយាយថា កងទ័ពជើងទឹករបស់ចិនកំពុងបង្កើតជញ្ជាំងពីរ ដែលមួយនៅបរិវេណរបស់តៃវ៉ាន់ និងមួយទៀតនៅខាងក្រៅប្រជុំកោះទីមួយ ដែលលាតសន្ធឹងពីភាគខាងត្បូងពីប្រទេសជប៉ុន និងឆ្លងកាត់តៃវ៉ាន់ទៅកាន់ហ្វីលីពីន។លោកថាសារដែលពួកគេកំពុងផ្ញើគឺសាមញ្ញណាស់។ដោយសំដៅលើដែនទឹករវាងតៃវ៉ាន់ និងចិន លោកនិយាយថា ច្រកសមុទ្រតៃវ៉ាន់គឺជារបស់យើង។

ក្រុមមន្ត្រីតៃវ៉ាន់និយាយថា ការដាក់ពង្រាយនេះបានកើតឡើងដោយគ្មានការប្រកាសណាមួយឡើយ ហើយហៅសកម្មភាពដែលកំពុងបន្តនោះ ថាជាសមយុទ្ធហ្វឹកហាត់។ទោះយ៉ាងណាក៏ដោយ លោក សេ បានព្រមានថា ការហ្វឹកហាត់អាចក្លាយជាសមយុទ្ធ ហើយសមយុទ្ធអាចក្លាយជាសង្គ្រាម៕