រូបភាពពីយានដ្រូនដែលចេញផ្សាយដោយកាកបាទក្រហមប្រទេសហ្វីលីពីន កាលពីថ្ងៃអង្គារ ទី១០ ខែ ធ្នូ បានបង្ហាញលំនៅឋាន ផ្លូវ និងអគារជាច្រើន បានគ្របដណ្តប់ដោយផេះ បន្ទាប់ពីផ្ទុះភ្នំភ្លើងនៅក្នុងខេត្ត Negros Occidental ភាគកណ្តាលប្រទេសហ្វីលីពីន បានផ្ទុះ។

ភ្នំភ្លើង Kanlaon ជាភ្នំភ្លើងដ៏សកម្មមួយ លាតសន្ធឹងនៅខេត្តកោះ Negros Occidental និងខេត្ត Negros Oriental ភាគកណ្តាលប្រទេសអាស៊ីអាគ្នេយ៍មួយនេះ បានផ្ទុះជាលើកទីពីរក្នុងឆ្នាំនេះ កាលពីថ្ងៃចន្ទ ទី៩ ខែធ្នូ ដោយបានបញ្ជូនពពកផេះហោះឡើងរហូតដល់៤.០០០ម៉ែត្រ ទៅលើអាកាស នៅម៉ោងប្រហែល ៣ រសៀល ម៉ោងក្នុងស្រុក។

វិទ្យាស្ថានសិក្សាភ្នំភ្លើង និងរញ្ជួយដីប្រទេសហ្វីលីពីន បានបង្កើនកម្រិតប្រកាសអាសន្នរបស់ខ្លួន ដល់កម្រិត៣ លើមាត្រដ្ឋាន៥កម្រិត។

កម្រិតទី៣ មានន័យថា មានហានិភ័យកើនឡើងនៃលំហូរកម្អែភ្នំភ្លើង និងសក្តានុពលសម្រាប់ការផ្ទុះដ៏គ្រោះថ្នាក់ ក្នុងរយៈពេលប៉ុន្មានសប្តាហ៍ខាងមុខនេះ។

ការិយាល័យការពារជនស៊ីវិល បាននិយាយថា ការជម្លៀសប្រជាជនបន្ទាន់ កំពុងដំណើរការសម្រាប់ប្រជាជនដែលរស់នៅក្បែរភ្នំភ្លើងនេះ ប៉ុន្តែពុំបាននិយាយថាតើមានមនុស្សប៉ុន្មាននាក់ ដែលត្រូវបានជម្លៀសរហូតមកដល់ពេលនេះ នោះទេ។

ប្រជាជនប្រហែល ៥៤.០០០នាក់ អាចរងផលប៉ះពាល់ដោយសារការផ្ទុះភ្នំភ្លើងនេះ។