ក្រុមហ៊ុនផលិតយន្តហោះ Boeing បាននិយាយកាលពីថ្ងៃអង្គារថា ខ្លួនបានបន្តការផលិត យន្តហោះ 737 MAX នៅទីក្រុង Renton បន្ទាប់ពីកូដកម្មទ្រង់ទ្រាយដ៏ធំ បណ្តាលឲ្យរោងចក្រ នៅក្នុងតំបន់ Puget Sound សហរដ្ឋអាមេរិក ត្រូវទុកចោលពីខែកញ្ញា ដល់ពាក់កណ្តាល ខែ វិច្ឆិកា។

ក្រុមហ៊ុន Boeing បាននិយាយកាលពីថ្ងៃអង្គារថា ក្រុមហ៊ុនរំពឹងថានឹងបន្តការផលិតយន្តហោះ 767 និង 777 /777X នៅតំបន់ Everett នៅប៉ុន្មានថ្ងៃខាងមុខនេះ។ ក្រុមហ៊ុន Boeing បាននិយាយនៅក្នុងសេចក្តីប្រកាសប្រចាំខែដែលរៀបរាប់លម្អិតអំពីការបញ្ជាទិញ និងការបញ្ជូនយន្តហោះរបស់ខ្លួន។

ក្រុមហ៊ុន និយាយថា ខណៈក្រុមហ៊ុនបានងើបឡើងវិញពីកូដកម្ម ក្រុមហ៊ុន Boeing បានបញ្ជូនយន្តហោះចំនួន១៣ គ្រឿង ភាគច្រើនចេញពីសារពើភ័ណ្ឌរបស់ខ្លួននៅក្នុងខែវិច្ឆិកា។ 

វាជាការធ្លាក់ចុះខ្លាំង បើប្រៀបធៀបទៅនឹងខែដូចគ្នាកាលពីឆ្នាំមុន ដែលនៅពេលនោះ ក្រុមហ៊ុនបានបញ្ជូនចេញយន្តហោះពាណិជ្ជកម្មចំនួន៥៦គ្រឿង។ ក្រុមហ៊ុន Boeing បាននិយាយថា ក្រុមហ៊ុនកំពុងធ្វើការដើម្បីត្រឡប់ទៅរកអត្រាផលិតកម្មកាលពីនៅមុនពេលធ្វើកូដកម្ម។

អ្នកនាំពាក្យម្នាក់បាននិយាយថា នៅក្នុងតំបន់ Everett ក្នុងខែសីហា មួយខែមុនពេលការធ្វើកូដកម្ម ក្រុមហ៊ុន Boeing ផលិតយន្តហោះប្រភេទ 767 ចំនួនបីគ្រឿងក្នុងមួយខែ និង 777 /777X ចំនួនបួនគ្រឿងក្នុងមួយខែ។