ប្រធានាធិបតី លោក Joe Biden កាលពីថ្ងៃអង្គារ (ទី១០ ខែធ្នូ) បានផ្តោតដោយផ្ទាល់ទៅលើរបៀបវារៈសេដ្ឋកិច្ចរបស់លោក Donald Trump ដោយបាននិយាយមើលស្រាលដល់ផែនការរបស់ប្រធានាធិបតីជាប់ឆ្នោតរូបនេះថា គម្រោងដំឡើងពន្ធ និងកាត់បន្ថយពន្ធយ៉ាងទូលំទូលាយនេះ គឺជា «កំហុសដ៏ធំ» ដែលនឹងធ្វើឲ្យសេដ្ឋកិច្ចធ្លាក់ចុះ។

ក្នុងសុន្ទរកថា នៅឯវិទ្យាស្ថាន Brookings លោក Biden បានព្រមានថា ផែនការរបស់លោក Trump នឹងផ្តល់ផលប្រយោជន៍យ៉ាងធំធេងដល់អ្នកមានទ្រព្យសម្បត្តិ ដោយបញ្ច្រាសពីអ្វីដែលលោកបានពិពណ៌នាថា ជាដំណើរការដែលត្រូវបានធ្វើឡើងក្នុងរយៈពេល ៤ឆ្នាំចុងក្រោយនេះ ដើម្បីជួយលើកកម្ពស់កម្រិតជីវភាពវណ្ណៈកម្មករ។

លោក Biden បានលើកឡើងថា៖ «តាមអ្វីដែលបានឮមក រដ្ឋបាលខាងមុខ នឹងធ្វើឲ្យប្រទេសវិលទៅកាន់ដំណាក់កាលនៃសេដ្ឋកិច្ចដែលផ្ដល់ផលយ៉ាងធំធេងដល់ក្រុមអ្នកមាន។ លើសពីនេះទៅទៀត លោក (Trump) ហាក់ដូចជាបានប្ដេជ្ញាថា នឹងដាក់ពន្ធជាសកលលើទំនិញសំខាន់ៗទាំងអស់ ដែលនាំចូលមកក្នុងប្រទេសនេះ ដោយផ្អែកលើការជឿខុស ដែលថា បណ្ដាប្រទេសបរទេស នឹងខាតបង់ដោយសារការដំឡើងពន្ធទាំងនោះ ជាជាងអតិថិជនអាមេរិក»។

ការកត់សម្គាល់បែបនេះរបស់លោក បង្ហាញពីការរិះគន់ដ៏ស្រួចស្រាល់ និងទូលំទូលាយបំផុតរបស់លោកប្រធានាធិបតីជិតផុតអាណត្តិ ចំពោះលោក Trump គិតចាប់តាំងពីការបោះឆ្នោតខែវិច្ឆិកា ដោយលោកកាន់តែបង្កើនការរិះគន់ដោយផ្ទាល់ខ្លាំងឡើងៗ នៅពេលដែលលោកបានថ្លែងសុន្ទរកថាយូរទៅៗជិត ៤០នាទី។

លោក Biden បានស្តីបន្ទោសលោក Trump ថា បានចាត់ចែងមិនត្រឹមត្រូវ ក្នុងការការឆ្លើយតបនឹងជំងឺរាតត្បាត និងធ្វើឲ្យវិបត្តិសេដ្ឋកិច្ចកាន់តែយ៉ាប់ៗទៅ ដែលប្រធានាធិបតីបច្ចុប្បន្ន បានទទួលបន្ត នៅឆ្នាំ២០២១។ លោកបានចំអកឲ្យលោក Trump ចំពោះការលើកកម្ពស់ហេដ្ឋារចនាសម្ព័ន្ធអាណត្តិដំបូងដែលមិនជោគជ័យ។ ហើយលោកបានព្រមានថា ផែនការរបស់លោក Trump ក្នុងការបន្តសំណុំនៃការកាត់បន្ថយពន្ធដែលផុតកំណត់ នឹងជំរុញឲ្យមានឱនភាព ឬនាំឲ្យមានការកាត់បន្ថយយ៉ាងខ្លាំងក្លាដល់សេវាកម្មសង្គម៕