ក្រុមហ៊ុនដែក Nippon Steel នៅថ្ងៃពុធ (ទី១១ ខែធ្នូ) បានរិះគន់ការមានប្រើឥទ្ធិពលនយោបាយ «មិនសមហេតុផល» លើគម្រោងកាន់កាប់ក្រុមហ៊ុន US Steel បន្ទាប់ពីប្រព័ន្ធផ្សព្វផ្សាយ បានរាយការណ៍ថា ប្រធានាធិបតីលោក Joe Biden នឹងរារាំងមិនឲ្យកិច្ចព្រមព្រៀងកើតឡើងឡើយ។

គួរបញ្ជាក់ថា កិច្ចព្រមព្រៀងដែលមានតម្លៃ ១៤,៩ពាន់លានដុល្លារអាមេរិក ក្នុងនោះមានរួមបញ្ចូលទាំងបំណុលផងដែរ កំពុងត្រូវបានពិនិត្យដោយស្ថាប័នមួយ នៅទីក្រុងវ៉ាស៊ីនតោន ដែលវាយតម្លៃពីការកាន់កាប់របស់បរទេសលើក្រុមហ៊ុនសហរដ្ឋអាមេរិក។ ហើយសារព័ត៌មាន Bloomberg ដោយដកស្រង់សម្តីបុគ្គលស្និទ្ធនឹងបញ្ហានេះ បានឲ្យដឹងថា លោក Biden គ្រោងនឹងរារាំងការលក់នេះ ដោយសារហេតុផលសន្តិសុខជាតិ នៅពេលដែលការត្រួតពិនិត្យ ត្រូវបានបញ្ចប់ចុងខែនេះ។

ក្នុងសេចក្តីថ្លែងការណ៍របស់ខ្លួន ក្រុមហ៊ុន Nippon Steel បានលើកឡើងថា៖ «វាជារឿងមិនសមហេតុផលទេ ដែលនយោបាយបន្តមានឥទ្ធិពលលើសពីផលប្រយោជន៍សន្តិសុខជាតិពិតប្រាកដ ជាពិសេសជាមួយនឹងសម្ព័ន្ធភាពដែលមិនអាចខ្វះបាន រវាងសហរដ្ឋអាមេរិក និងជប៉ុន ដែលជាមូលដ្ឋានគ្រឹះដ៏សំខាន់»។

ក្រុមហ៊ុនបានបន្ថែមថា៖ «យើងបានចូលរួមដោយស្មោះត្រង់ជាមួយគ្រប់ភាគី ដើម្បីគូសបញ្ជាក់ពីរបៀបដែលប្រតិបត្តិការនេះ នឹងជំរុញសេដ្ឋកិច្ច និងសន្តិសុខជាតិរបស់អាមេរិក ដោយប្រឆាំងនឹងការគំរាមកំហែងដែលបង្កឡើងដោយប្រទេសចិន។ ក្រុមហ៊ុន Nippon Steel នៅតែមានទំនុកចិត្តលើយុត្តិធម៌ និងភាពត្រឹមត្រូវរបស់អាមេរិក និងប្រព័ន្ធច្បាប់របស់ប្រទេសនេះ ហើយប្រសិនបើចាំបាច់ នឹងធ្វើការជាមួយក្រុមហ៊ុន US Steel ដើម្បីពិចារណា និងចាត់វិធានការដែលមានទាំងអស់ ដើម្បីឈានដល់ការសន្និដ្ឋានដោយយុត្តិធម៌»។

ប្រធានាធិបតីជាប់ឆ្នោត លោក Donald Trump ដែលនឹងត្រូវប្រារព្ធពិធីកាន់តំណែង នៅថ្ងៃទី២០ ខែមករា ក៏បានប្តេជ្ញាទប់ស្កាត់កិច្ចព្រមព្រៀងនេះផងដែរ ដោយសន្យាថា នឹងជំរុញវិស័យដែកថែបរបស់អាមេរិកតាមរយៈការលើកទឹកចិត្តកាត់បន្ថយពន្ធ និងដំឡើងពន្ធការនាំចូលជំនួសវិញ៕