អ្នកនាំពាក្យក្រសួងការបរទេស លោក Matthew Miller កាលពីថ្ងៃអង្គារ (ទី១០ ខែធ្នូ) បាននិយាយថា សហរដ្ឋអាមេរិកបានស្នើឲ្យក្រុមឧទ្ទាម Hayat Tahrir al-Sham (HTS) របស់ប្រទេសស៊ីរី ជួយកំណត់ទីតាំង និងដោះលែងអ្នកសារព័ត៌មានអាមេរិក លោក Austin Tice ដែលបាត់ខ្លួន ខណៈដែលក្រុមនេះរំដោះអ្នកទោសរបស់ប្រទេសនេះ បន្ទាប់ពីបានផ្តួលរំលំលោក Bashar al-Assad។

លោក Miller បានប្រាប់សន្និសីទសារព័ត៌មានថា ទីក្រុងវ៉ាស៊ីនតោនកំពុងប្រាប់គ្រប់ភាគី នៅប្រទេសស៊ីរីថា លោក Tice ដែលត្រូវបានពង្រាត់ នៅស៊ីរី ក្នុងឆ្នាំ២០១២ គឺជាអាទិភាពចម្បងរបស់សហរដ្ឋអាមេរិក។

លោក Miller បាននិយាយថា សារត្រូវបានផ្ញើតាមរយៈអន្តរការីទៅកាន់ក្រុម HTS ជាក្រុមដែលដឹកនាំប្រតិបត្តិការរបស់ក្រុមឧទ្ទាមដកអំណាចរបស់លោក Assad និងដែលសហរដ្ឋអាមេរិកចាត់ទុកថា ជាក្រុមភេរវករ ក៏ដូចជាអង្គភាពផ្សេងទៀតដែលកំពុងប្រតិបត្តិការនៅស៊ីរីដែរ។

ប្រធានាធិបតីជិតផុតអាណត្តិ លោក Joe Biden បាននិយាយថា លោកជឿថា លោក Tice នៅមានជីវិត ហើយបានបញ្ជូនបេសកជនទទួលបន្ទុកកិច្ចការចំណាប់ខ្មាំង លោក Roger Carstens ទៅកាន់តំបន់នោះ ដែលជាផ្នែកនៃកិច្ចខិតខំប្រឹងប្រែងយ៉ាងយកចិត្តទុកដាក់ក្នុងការធ្វើយ៉ាងណាឲ្យអ្នកសារព័ត៌មានរូបនេះមានសេរីភាព៕