នៅថ្ងៃពុធនេះ ពលរដ្ឋស៊ីរី បានវិលត្រឡប់មកធ្វើដំណើរតាមដងផ្លូវវិញ បើទោះបីជាវាមានសភាពស្ងាត់ជ្រងំជាងមុនក៏ដោយ ពេលដែលពួកគេបន្តការងារប្រចាំថ្ងៃឡើងវិញ ក្នុងនោះការតម្រង់ជួរយ៉ាងវែង ត្រូវបានគេមើលឃើញផងដែរនៅហាងនំបុ័ង ។

ធនាគារបានបើកទ្វារឡើងវិញជាលើកដំបូងកាលពីថ្ងៃអង្គារ ចាប់តាំងពីផ្តួលរំលំរបបផ្តាច់ការរបស់លោក Assad ។ ហាងបានបើកទ្វារម្តងទៀតផងដែរ ចរាចរណ៍បានវិលត្រឡប់មកកាន់ដងផ្លូវវិញ អ្នកអនាម័យនាំគ្នាបោសសម្អាតដងផ្លូវ និងមានក្រុមប្រដាប់អាវុធតិចជាងមុន ។

នៅក្នុងសុន្ទរកថាលើកញ្ចក់ទូរទស្សន៍រដ្ឋកាលពីថ្ងៃអង្គារ លោក Mohammed al-Bashir ដែលជាឥស្សរជនមិនសូវគេស្គាល់នៅទូទាំងប្រទេសស៊ីរី បាននិយាយថា លោកនឹងដឹកនាំអាជ្ញាធរបណ្តោះអាសន្ន ស៊ីរី ក្នុងនាមជានាយករដ្ឋមន្រ្តីស្តីទី រហូតដល់ថ្ងៃទី ១ ខែមីនា ដោយមានការគាំទ្រពីអតីតក្រុមឧទ្ទាម ។

សូមបញ្ជាក់ថា ការកសាងប្រទេសស៊ីរីឡើងវិញ គឺជាភារកិច្ចដ៏ធំសម្បើមមួយ បន្ទាប់ពីសង្រ្គាមស៊ីវិលសម្លាប់មនុស្សរាប់ម៉ឺនរាប់សែននាក់ ។ 

ទីក្រុងត្រូវបានទម្លាក់គ្រាប់បែកក្លាយជាគំនរបាក់បែក តំបន់ជនបទគ្មានមនុស្សរស់នៅ សេដ្ឋកិច្ចត្រូវបានបំផ្លាញដោយទណ្ឌកម្មអន្តរជាតិ ហើយជនភៀសខ្លួនរាប់លាននាក់ បន្តរស់នៅក្នុងជំរំ ក្រោយការជម្លៀសខ្លួនមួយក្នុងចំណោមការជម្លៀសខ្លួនមនុស្សធំបំផុតនៅក្នុងសម័យកាលទំនើប ៕