ប្រធានពាណិជ្ជកម្មជាន់ខ្ពស់ និងប្រភពចំនួន ៣ផ្សេងទៀត បានប្រាប់សារព័ត៌មានថា ទូដែកនៅក្នុងធនាគារកណ្តាលរបស់ប្រទេសស៊ីរី មិនត្រូវបានក្រុមចោរប៉ះពាល់ឡើយ ក្នុងពេលមានភាពចលាចលដែលបានគ្របដណ្ដប់ទីក្រុងដាម៉ាស រយៈពេលខ្លី បន្ទាប់ពីការដួលរំលំនៃរបបរបស់ប្រធានាធិបតី លោក Bashar al-Assad។

គួរបញ្ជាក់ថា ក្រុមឧទ្ទាមស៊ីរីបានដណ្តើមកាន់កាប់ទីក្រុងដាម៉ាស ដោយមិនមានការប្រឆាំងតបតអ្វីឡើយ កាលពីថ្ងៃអាទិត្យចុងសប្ដាហ៍កន្លងមក បន្ទាប់ពីបានបើកប្រតិបត្តិការវាយរុលទៅមុខលឿនដូចផ្លេកបន្ទោរ ដែលបាននាំឲ្យលោក Assad ភៀសខ្លួនទៅកាន់ប្រទេសរុស្ស៊ី ដោយព្រឹត្តិការណ៍នេះកើតឡើងក្រោយមានសង្គ្រាមស៊ីវិលរយៈពេល ១៣ឆ្នាំ និងការគ្រប់គ្រងបែបអត្តាធិបតេយ្យរបស់គ្រួសារ Assad ជាង ៥ទសវត្សរ៍។

លោក Bassel Hamawi ប្រធានសភាពាណិជ្ជកម្មទីក្រុងដាម៉ាស បាននិយាយថា អាជ្ញាធរបានបញ្ជាក់ប្រាប់លោកថា ចោរបានលួចលុយមួយចំនួនពីអគារធនាគារកណ្តាល ប៉ុន្តែថា ទូដែកសំខាន់មិនទាន់ត្រូវបានប៉ះពាល់នៅឡើយទេ។ គេមិនដឹងទេថា តើប្រាក់ចំនួនប៉ុន្មានត្រូវបានរក្សាទុកនៅក្នុងទូដែកនោះ។

ប្រភព ២ផ្សេងទៀតដែលទាក់ទងជាមួយមន្ត្រីធនាគារកណ្តាល បានប្រាប់ថា ពួកគេក៏ត្រូវបានជូនដំណឹងផងដែរថា ចោរលួចដែលដើរតាមផ្លូវក្នុងទីក្រុងដាម៉ាស ប៉ុន្មានម៉ោងក្រោយយោធារបស់របបលោក Assad ដាក់អាវុធ មិនបានប៉ះពាល់ទូដែកសំខាន់នោះឡើយ។ ចំណែកប្រភពមួយទៀតស្និទ្ធនឹងក្រុមឧទ្ទាមធំជាងគេ គឺ Hayat Tahrir al-Shams (HTS) ដែលបានជួបជាមួយទេសាភិបាលធនាគារកណ្តាល បាននិយាយថា ទុនបម្រុងទាំងអស់មិនបាត់ឡើយ៕