ទូរទស្សន៍ Al Arabiya បានរាយការណ៍ថា ចលនាហាម៉ាសរបស់ប៉ាឡេស្ទីន បានប្រគល់ទៅឲ្យប្រទេសអេហ្ស៊ីបនូវបញ្ជីឈ្មោះចំណាប់ថ្នូរអ៊ីស្រាអែល ដែលបច្ចុប្បន្នកំពុងជាប់ឃុំ នៅតំបន់ហ្កាហ្សាស្ទ្រីប។

រហូតមកទល់ពេលនេះ ទាំងក្រុមហាម៉ាស និងអេហ្ស៊ីប មិនបានបញ្ជាក់ពីរបាយការណ៍នេះទេ។

យោងតាមប្រភពរបស់ទូរទស្សន៍នេះ បានឲ្យដឹងថា ក្រុមអ្នកសម្រុះសម្រួល កំពុងពិភាក្សាគ្នាយ៉ាងហ្មត់ចត់អំពីលទ្ធភាពបទឈប់បាញ់ នៅតំបន់ហ្កាហ្សាស្ទ្រីប ដោយដាក់សម្ពាធលើអ៊ីស្រាអែលឲ្យដកកងទ័ពរបស់ខ្លួនចេញពីច្រករបៀង Philadelphi ដែលជាដីនៅព្រំដែនរវាងអេហ្ស៊ីប និងតំបន់ហ្កាហ្សា។ .

យោងតាមប្រភពរបស់Al Arabiya អាជ្ញាធរជាតិប៉ាឡេស្ទីន ត្រូវបានគេសន្មតថា នឹងគ្រប់គ្រងលើច្រកព្រំដែន Rafah ជាមួយអេហ្ស៊ីប។

ទូរទស្សន៍ Al Qahera Al Ekhbariya បានរាយការណ៍កាលពីថ្ងៃអង្គារថា គណៈប្រតិភូអ៊ីស្រាអែលបានមកដល់ទីក្រុងគែរ ដើម្បីពិភាក្សាអំពីបទឈប់បាញ់ នៅតំបន់ហ្កាហ្សាស្ទ្រីប។ មុននោះ គណៈប្រតិភូ ហាម៉ាស បានធ្វើទស្សនកិច្ចនៅរដ្ឋធានីអេហ្ស៊ីប។ កាលពីថ្ងៃទី ០៨ ខែធ្នូ សមាជិករបស់ខ្លួន បានពិភាក្សាអំពីបញ្ហានៃបទឈប់បាញ់ដែលអាចកើតមាន និងការគ្រប់គ្រងក្រោយជម្លោះនៃតំបន់ជាមួយប្រធានសេវាស៊ើបការណ៍សម្ងាត់អេហ្ស៊ីប ឧត្តមសេនីយ៍ឯក Hassan Mahmoud Rashad។