ក្រសួងការបរទេសចិន បាននិយាយនៅថ្ងៃពុធនេះថា ពួកគេសូមធ្វើការជំទាស់ទាំងស្រុង និងថ្កោលទោសដាច់ណាត់ចំពោះទណ្ឌកម្មរបស់កាណាដាលើ អតីតមន្រ្តីជាន់ខ្ពស់ និងមន្រ្តីជាន់ខ្ពស់បច្ចុប្បន្នរបស់ចិន ជុំវិញករណីចោទប្រកាន់ថាបានបំពានសិទ្ធិមនុស្ស ។

អ្នកនាំពាក្យក្រសួងការបរទេសចិនអ្នកស្រី Mao Ning និយាយប្រាប់សន្និសីទសារព័ត៌មានថា ចិនគិតថា វាគឺជារឿងសំខាន់ក្នុងការគោរព និងការពារសិទ្ធិមនុស្ស ហើយកាណាដា ពុំស្ថិតក្នុងជំហរត្រូវបង្រៀនអ្នកដទៃពីសិទ្ធមនុស្ស ឬដាក់ទណ្ឌកម្មនោះឡើយ ។

អ្នកស្រីបន្តថា ចិនសូមធ្វើការជំរុញឲ្យកាណាដាបញ្ឈប់ជ្រៀតជ្រែកក្នុងកិច្ចការផ្ទៃក្នុង និងធ្វើឲ្យខូចខាតផលប្រយោជន៍របស់ខ្លួន និងរូបភាពក្រោមលេសសិទ្ធិមនុស្ស ហើយទីក្រុងប៉េកាំង នឹងចាត់វិធានការចាំបាច់ ដើម្បីការពារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ខ្លួន ។

កាលពីថ្ងៃអង្គារម្សិលមិញ កាណាដា បានដាក់ទណ្ឌកម្មលើអតីតមន្រ្តីជាន់ខ្ពស់ និងមន្រ្តីជាន់ខ្ពស់បច្ចុប្បន្នចំនួន ៨រូប ដោយពួកគេលើកឡើងពីករណីចោទប្រកាន់ថាបានបំពានសិទ្ធិមនុស្សនៅតំបន់ Xinjiang និងតំបន់ទីបេតិ៍ លើអ្នកដើរតាមក្រុមសាសនា Falun Gong ។

គោលដៅទណ្ឌកម្មរបស់កាណាដា រួមទាំងលោក Chen Quanguo ដែលជាអតីតប្រធានបក្សកុម្មុយនិស្តនៅតំបន់ Xinjiang និងលោក Wu Yingjie គឺជាប្រធានបក្សកុម្មុយនិស្តនៅតំបន់ទីបេតិ៍ ចន្លោះឆ្នាំ ២០១៦ និងឆ្នាំ ២០២១ ៕