ទីភ្នាក់ងារសហប្រតិបត្តិការសន្តិសុខការពារជាតិ (DSCA) បាននិយាយថា ក្រសួងការបរទេសសហរដ្ឋអាមេរិក បានអនុញ្ញាតឲ្យមានលទ្ធភាពលក់ឧបករណ៍ជាច្រើនសម្រាប់យន្តហោះចម្បាំង F-16 និងសេវាកម្មពាក់ព័ន្ធដែលមានតម្លៃសរុប ២៦៦.៤ លានដុល្លារ ឲ្យរដ្ឋាភិបាលទីក្រុងគីវ។

សេចក្តីថ្លែងការណ៍នេះ បានឲ្យដឹងថា៖«ក្រសួងការបរទេស បានធ្វើសម្រេចអនុម័តលទ្ធភាពការលក់ឲ្យ  ដៃគូបរទេស ដល់រដ្ឋាភិបាលអ៊ុយក្រែននូវសេវាកម្មទ្រទ្រង់យន្តហោះចម្បាំង F-16 និងឧបករណ៍ពាក់ព័ន្ធដែលតាមការប៉ាន់ប្រមាណត្រូវចំណាយទឹកប្រាក់ចំនួន ២៦៦.៤លានដុល្លារ»។

សេចក្តីថ្លែងការណ៍ បានបញ្ជាក់ថា ពីមុន រដ្ឋាភិបាលក្រុងគីវ បានស្នើសុំការអនុញ្ញាតពីទីក្រុងវ៉ាស៊ីនតោន ដើម្បីទិញឧបករណ៍ និងគ្រឿងបន្លាស់ផ្សេងៗសម្រាប់យន្តហោះចម្បាំងទាំងនេះ។ ក្រៅពីនោះ អាជ្ញាធរអ៊ុយក្រែន បានស្នើសេវាកម្មផ្សេងៗទាក់ទងនឹងការថែទាំ និងជួសជុលយន្តហោះទាំងនេះ។

ទីភ្នាក់ងារសហប្រតិបត្តិការសន្តិសុខការពារជាតិ (DSCA) បាននិយាយថា៖«ការលក់ដែលបានស្នើឡើងនេះ នឹងគាំទ្រដល់គោលដៅគោលនយោបាយការបរទេស និងគោលដៅសន្តិសុខជាតិរបស់សហរដ្ឋអាមេ រិក ដោយការកែលម្អសន្តិសុខនៃប្រទេសជាដៃគូ»។

សហរដ្ឋអាមេរិកជឿជាក់ថា កិច្ចព្រមព្រៀង «នឹងធ្វើឲ្យប្រសើរឡើងនូវសមត្ថភាពរបស់អ៊ុយក្រែន ក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគត»។