នៅក្នុងមន្ទីរពេទ្យទីក្រុង Sao Paulo ប្រធានាធិបតីប្រេស៊ីលលោក Luiz Inacio Lula da Silva កំពុងស្ថិតក្នុងដំណើរការជាសះស្បើយឡើងវិញ ក្រោយការវះកាត់បន្ទាន់ ដើម្បីបង្ហូរឈាមនៅក្នុងខួរក្បាលរបស់លោក ពាក់ព័ន្ធនឹងការដួលកាលពីខែតុលាកន្លងទៅ ។

 កាលពីល្ងាចថ្ងៃចន្ទ ក្រោយត្អូញត្អែរពីការឈឺក្បាលខ្លាំង អំឡុងជំនួបជាមួយក្រុមមេដឹកនាំសភា លោក Lula ត្រូវបាននាំទៅកាន់មន្ទីរពេទ្យ ជាទីដែលការថតស្កេន MRI រកឃើញការហូរឈាមក្នុងខួរក្បាលរបស់លោក ។ 

យោងតាមការអះអាងរបស់ក្រុមគ្រូពេទ្យ បានឲ្យដឹងថា ភ្លាមៗនោះ លោក Lula ត្រូវបានដឹកតាមឧទ្ធម្ភាគចក្រទៅកាន់ទីក្រុង Sao Paulo សម្រាប់ការវះកាត់បន្ទាន់ ។

 មេដឹកនាំវ័យ ៧៩ឆ្នាំម្នាក់នេះ ត្រូវបានគ្រូពេទ្យនិយាយថា ស្ថិតក្នុងស្ថានភាពប្រក្រតីវិញហើយ ក្រោយការវះកាត់ដោយជោគជ័យ ។

 លោក Roberto Kalil គឺជាគ្រូពេទ្យរបស់លោក Lula និយាយថា លោក Lula នឹងវិលត្រឡប់ទៅផ្ទះវិញនៅដើមសប្តាហ៍ក្រោយ បើសិនជាអ្វីៗដំណើរការទៅយ៉ាងរលូន ។

 ខណៈពេលនោះដែរ លោក Carlos Douglas គឺជាពលរដ្ឋរស់នៅក្នុងទីក្រុង Sao Paulo បាននិយាយប្រាប់ទីភ្នាក់ងារព័ត៌មានរ៉យទ័រថា បើសិនជាអ្វីៗគ្រោះថ្នាក់ជាងនេះកើតឡើង លោកប្រាកដណាស់ថា វានឹងធ្វើឲ្យប៉ះពាល់ដល់រដ្ឋាភិបាលប្រេស៊ីល ៕