លោក Donald Trump បានលើកឡើងថា ការដោះស្រាយវិបត្តិអ៊ុយក្រែន នឹងក្លាយជាអាទិភាពធំចម្បងជាងគេរបស់លោក នៅពេលដែលលោកចូលកាន់តំណែង ក្នុងខែមករា ដោយពណ៌នាអំពីបញ្ហា នៅតំបន់មជ្ឈិមបូព៌ាថា ជា «ស្ថានភាពមិនសូវលំបាកណាស់ណាទេ»។

ក្នុងបទសម្ភាសន៍មួយជាមួយទស្សនាវដ្តីបារាំង Paris Match ដែលបានថតទុក កាលពីថ្ងៃទី៧ ខែធ្នូ និងចេញផ្សាយ នៅថ្ងៃទី១១ ខែធ្នូនេះ លោកប្រធានាធិបតីអាមេរិកជាប់ឆ្នោត បានប្រាប់ថា៖ «ខ្ញុំគិតថា យើងត្រូវដោះស្រាយបញ្ហាអ៊ុយក្រែនជាមួយរុស្ស៊ី»។

ដោយឆ្លើយតបទៅនឹងសំណួរអំពីអាទិភាពធំចម្បងជាងគេរបស់លោក នៅលើឆាកអន្តរជាតិ លោក Trump បានប្រាប់ថា៖ «ប្រទេសទាំងពីរនេះ កំពុងបាត់បង់យ៉ាងច្រើន ដែលគ្មាននរណាអាចជឿបាន។ ទាហានរាប់ម៉ឺននាក់ កំពុងត្រូវបានសម្លាប់»។

លោក Trump បានបន្ថែមថា៖ «ហើយពិតណាស់ តំបន់មជ្ឈិមបូព៌ា គឺជាអាទិភាពដ៏ធំមួយ។ ប៉ុន្តែខ្ញុំគិតថាមជ្ឈិមបូព៌ា មិនសូវជាមានស្ថានភាពលំបាកជាងអ៊ុយក្រែនជាមួយរុស្ស៊ីនោះឡើយ។ ប៉ុន្តែនោះជាស្ថានភាពដ៏ធំចំនួន ២ ដែលយើងត្រូវដោះស្រាយ ហើយយើងត្រូវដោះស្រាយវាឲ្យបានលឿន។ មនុស្សជាច្រើនកំពុងតែបាត់បង់ជីវិត»។

គួរបញ្ជាក់ថា លោក Trump បានធ្វើដំណើរទៅកាន់ទីក្រុងប៉ារីស កាលពីថ្ងៃទី៧ ខែធ្នូ ដើម្បីចូលរួមការបើក សម្ពោធវិហារ Notre Dame ឡើងវិញ បន្ទាប់ពីវិហារនេះត្រូវបានអគ្គិភ័យបំផ្លិចបំផ្លាញ ក្នុងឆ្នាំ២០១៩។ 

លោកបានជួបជាមួយប្រធានាធិបតីបារាំង លោក Emmanuel Macron និងមេដឹកនាំអ៊ុយក្រែន លោក Volodymyr Zelensky អំឡុងទស្សនកិច្ចរបស់លោកទៅកាន់ប្រទេសបារាំងនេះ ដែលជាការធ្វើដំណើរក្រៅប្រទេសលើកដំបូងរបស់លោក គិតចាប់តាំងពីលោកជាប់ឆ្នោតឡើងវិញ។ ហើយលោកបានប្រាប់ខ្លីៗថា៖ «យើងមាននូវការជួបប្រជុំគ្នាដ៏ល្អមួយជាមួយប្រធានធិបតី លោក Zelensky»៕