នៅថ្ងៃពុធនេះ ប្រជាពលរដ្ឋរស់នៅក្នុងទីក្រុងដាម៉ាស់ បានបង្ហាញសុទិដ្ឋិនិយមរបស់ពួកគេសម្រាប់អនាគតស៊ីរី បន្ទាប់ពីអ្វីដែលពួកគេចាត់ទុកថាជា “បដិវត្តន៍ពរជ័យ” រយៈពេលប៉ុន្មានថ្ងៃប៉ុណ្ណោះ ក្រោយផ្តួលរំលំរបបផ្តាច់ការរបស់លោកប្រធានាធិបតី Bashar al-Assad ។

លោក Hassan El Musafah គឺជាពលរដ្ឋស៊ីរីរស់នៅក្នុងទីក្រុងដាម៉ាស់ និយាយថា ពួកយើងអបអរសាទរពលរដ្ឋស៊ីរីដ៏អស្ចារ្យ លើជ័យជំនះនៃបដិវត្តន៍ពរជ័យនេះ ក្រោយឆ្លងកាត់ការឈឺចាប់ខ្លោចផ្សាអស់រយៈពេលជិត ១៣ឆ្នាំ ។ អ្វីដែលបានកើតឡើង គឺជាការផ្លាស់ប្តូរពីដំណាក់កាលអយុត្តិធម៌ និងផ្តាច់ការ ទៅជាដំណាក់កាលសេរីភាព និងការកសាងប្រទេសជាតិឡើងវិញ ។

នៅជិតស្ថានីយ៍រថភ្លើង Al-Hejaz ស្ថិតក្នុងទីក្រុងដាម៉ាស់ ពលរដ្ឋមួយចំនួនត្រូវបានគេមើលឃើញជាន់រូបថតសន្លឹកដែលគេបោះចោលរបស់លោក Assad និងទង់ជាតិផ្លូវការរបស់ស៊ីរី ខណៈពលរដ្ឋផ្សេងទៀត ចែករំលែកក្តីសង្ឃឹមរបស់ពួកគេ សម្រាប់អនាគតត្រចះត្រចង់ជាងនេះ ។

លោក Jamal Hassan El Sujari គឺជាពលរដ្ឋមួយរូបទៀតរបស់ស៊ីរី និយាយថា ពួកយើងសង្ឃឹមថា ដំណាក់កាលខាងមុខ នឹងនាំមកនូវសេចក្តីល្អដល់ពលរដ្ឋស៊ីរីទាំងអស់គ្នា ។

គួរឲ្យដឹងថា នៅក្នុងសុន្ទរកថាលើកញ្ចក់ទូរទស្សន៍រដ្ឋកាលពីថ្ងៃអង្គារ មេដឹកនាំស្តីទីរបស់ស៊ីរី លោក Mohammed al-Bashir ដែលជាឥស្សរជនមិនសូវគេស្គាល់នៅទូទាំងប្រទេសស៊ីរី បាននិយាយថា លោកនឹងដឹកនាំអាជ្ញាធរបណ្តោះអាសន្ន ស៊ីរី ក្នុងនាមជានាយករដ្ឋមន្រ្តីស្តីទី រហូតដល់ថ្ងៃទី ១ ខែមីនា ដោយមានការគាំទ្រពីអតីតក្រុមឧទ្ទាម ដែលបានផ្តួលរំលំលោក Assad ។

លោក Mohammed al-Bashir បានគ្រប់គ្រងរដ្ឋាភិបាលសង្រ្គោះដឹកនាំដោយក្រុមឧទ្ទាម មុនពេលការវាយប្រហារលឿនដូចផ្លេចបន្ទោររយៈពេល ១២ថ្ងៃ ដែលបានរុលចូលដល់ទីក្រុងដាម៉ាស់ ។

ដោយឡែក ការកសាងប្រទេសស៊ីរីឡើងវិញ គឺជាភារកិច្ចដ៏ធំសម្បើមមួយ បន្ទាប់ពីសង្រ្គាមស៊ីវិលសម្លាប់មនុស្សរាប់ម៉ឺនរាប់សែននាក់ ។ 

ទីក្រុងតូច-ធំ ត្រូវបានទម្លាក់គ្រាប់បែកក្លាយជាគំនរបាក់បែក តំបន់ជនបទគ្មានមនុស្សរស់នៅ សេដ្ឋកិច្ចត្រូវបានបំផ្លាញដោយទណ្ឌកម្មអន្តរជាតិ ហើយជនភៀសខ្លួនរាប់លាននាក់ បន្តរស់នៅក្នុងជំរំ ក្រោយការជម្លៀសខ្លួនមួយក្នុងចំណោមការជម្លៀសខ្លួនមនុស្សធំបំផុតនៅក្នុងសម័យកាលទំនើប ៕