សេវាសង្គ្រោះបន្ទាន់ និងកាកបាទក្រហម នៅថ្ងៃពុធ (ទី១១ ខែធ្នូ) បានឲ្យដឹងថា យ៉ាងហោចណាស់ជនអន្តោប្រវេសន៍ចំនួន ៦នាក់ បានបាត់បង់ជីវិត ពេលព្យាយាមធ្វើដំណើរទៅឲ្យដល់ប្រជុំកោះ Canary របស់ប្រទេសអេស្ប៉ាញ ដោយជិះទូកមិនមានសុវត្ថិភាពចេញពីតំបន់អាហ្វ្រិកខាងលិច។

សេវាសង្គ្រោះបន្ទាន់បានប្រាប់ថា ជនអន្តោប្រវេសន៍ចំនួន ៥នាក់ ក្នុងចំណោម ៦៥នាក់ នៅលើទូកគ្មានដំបូលដែលបានទៅដល់កោះតូចមួយ El Hierro នាពេលយប់ ត្រូវបានប្រទះឃើញស្លាប់ ខណៈដែលជនអន្តោប្រវេសន៍ម្នាក់ទៀត ត្រូវបានឃើញស្លាប់នៅក្នុងនាវាមួយ ក្នុងចំណោមនាវា ៣ផ្សេងទៀត ដែលត្រូវបានជួយសង្គ្រោះដោយឆ្មាំល្បាតឆ្នេរអេស្ប៉ាញ។

គួរបញ្ជាក់ថា ចំនួនជនអន្តោប្រវេសន៍ដែលបានទៅដល់ប្រជុំកោះ Canary របស់អេស្ប៉ាញ បានកើនឡើងដល់កម្រិតខ្ពស់ប្រចាំឆ្នាំជាលើកទី២ ជាប់ៗគ្នា ក្នុងឆ្នាំ២០២៤ ហើយកោះទាំង៧ នៅភាគពាយ័ព្យទ្វីបអាហ្រ្វិក កំពុងប្រឹងប្រែងដោះស្រាយសម្រាលការកើនឡើងនៃចំនួនមនុស្សដែលជិះទូកយ៉ាងណែនណាន់តាប់តាប់ ដើម្បីស្វែងរកឱកាសល្អប្រសើរជាងនេះ នៅទ្វីបអឺរ៉ុប។

ប៉ុន្តែទិន្នន័យចុងក្រោយបង្អស់ បង្ហាញថា ចំនួនជនអន្តោប្រវេសន៍ដែលបាត់ខ្លួន ឬស្លាប់ ក្នុងការធ្វើដំណើរនោះ គឺកើនឡើង ៥ដងលឿនជាងចំនួនអ្នកដែលបានទៅដល់គោលដៅដោយមានជីវិត៕

បើយោងតាមកាកបាទក្រហម បានឲ្យដឹងថា រហូតមកដល់ពេលនេះ ចំនួនជនអន្តោប្រវេសន៍មិនទៀងទាត់ប្រហែល ២០.០០០នាក់ បានទៅដល់កោះ El Hierro។ ចំនួននោះ គឺប្រហែលពាក់កណ្តាលនៃចំនួនសរុបជាង ៤០.០០០នាក់ដែលបានទៅដល់ប្រជុំកោះនេះ ក្នុងរយៈពេលនេះ៕