ភ្នំពេញ៖ ខេត្តចំនួន៥ រួមមាន ខេត្តកំពត, ខេត្តកំពង់ឆ្នាំង, ខេត្តកំពង់ស្ពឺ, ខេត្តតាកែវ, និង ខេត្តកណ្តាល នឹងទទួលបានផ្លូវជនបទក្រាលកៅស៊ូពីរជាន់ (DBST) ក្នុងពេលឆាប់ៗខាងមុខនេះ តាមរយៈគម្រោង កែលម្អផ្លូវជនបទជំហានទី៣ របស់ក្រសួងអភិវឌ្ឍន៍ជនបទ។ នេះបើតាមការឱ្យដឹងពី ឯកឧត្តមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទ នាថ្ងៃទី ២៨ ខែតុលា ឆ្នាំ ២០២១ នេះ។

ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ បានខិតខំយកចិត្តទុកដាក់ ក្នុងការសម្របសម្រួលជាមួយក្រសួងស្ថាប័នពាក់ព័ន្ធ និងជំរុញរាល់សកម្មភាពការងារក្នុងដំណើរការរៀបចំគម្រោងកែលម្អផ្លូវជនបទជំហានទី៣ ក្រោមឥណទានសម្បទានរបស់សាធារណរដ្ឋកូរ៉េ។

គម្រោងកែលម្អផ្លូវជនបទជំហានទី៣នេះ ចាប់ដំណើរការតាំងពីឆ្នាំ ២០១៨ រហូតមកដល់ពេលនេះ ទើបគម្រោងសម្រេចបានលទ្ធផលដែលអាចនឹងចាប់ផ្តើមសកម្មភាពក្នុងការកែលម្អផ្លូវជនបទ នៅក្នុងខេត្តគោលដៅចំនួន ៥ ដែលមានផ្លូវសរុបចំនួន ៣៨ខ្សែ ប្រវែងសរុបចំនួន ៣៦៥.២៤គីឡូម៉ែត្រ ដែលក្រសួងអភិវឌ្ឍន៍ជនបទបានចុះកិច្ចសន្យា សាងសង់ជាមួយក្រុមហ៊ុនកូរ៉េឈ្មោះ ILSUNG Construction Co., Ltd។

តាមការបញ្ជាក់ពី ឯកឧត្តមបណ្ឌិត ចាន់ ដារ៉ុង រដ្ឋលេខាធិការក្រសួងអភិវឌ្ឍន៍ជនបទសកម្មភាពនៃ ការកែលម្អផ្លូវជនបទគ្រោងនឹងចាប់ផ្តើមនៅក្នុងអំឡុងត្រីមាសទី៤ ឆ្នាំ២០២១ ហើយនិងគ្រោងបញ្ចប់ ទាំង ៣៨ ខ្សែនៅក្នុងខែមិថុនា ឆ្នាំ២០២៤៕